Kwayedza
Kingstone Mapupu
MUIMBI wechitendero, Gogo Dorcas Muranda (77), vemuMbare National, muHarare, vanoti vari kutarisira kusvika kure munyaya dzemimhanzi.
Vanoti chipo chekuimba chakabvira vari kuchikoro paChitenderano Primary School, kumusha kwavo kwaRusape, ndokuzoenderera mberi vave kusekondari vachigara kuZengeza, kuChitungwiza.
Mbuya ava vanoimba nechikwata cheGogo Muranda Gospel Music uye vakatsikisa dambarefu ravo rekutanga mugore ra2021.
“Kunyangwe chipo chekuimba chakatanga ndiri mudiki kubva kuchikoro kusvika izvozvi, ndaishaya mukana wekutsikisa kusvikira ndakazodzikisa pfungwa ndava kuona zera rangu, ndinofa ndisina kuparidza kuruzhinji nekuimba. Ndakazovamba chikwata changu mugore ra2017 ndokutsikisa dambarefu rangu rekutanga muna2021 rinonzi Dombo NdiJesu iro rine nziyo pfumbamwe,” vanodaro Gogo Muranda.
Vanoti vakadzidza Standard Six ndokuzogumira paZJC.
Muchikwata chavo vanobatsirana nevamwe vanosanganisira Mai Nyamasoka naMai Tapomwa uyewo nemuzukuru wavo, Sinyorita Nyamuda.
“Sevamwewo vaimbi vose, ndina maneja wangu – Brendon Kamhanda – uyo anoshanda neni zvakanaka nekundipa mazano. Ndine kambo (single) kanonzi Tinozorora Tasvika kandakaita pamwe chete naAgatha Murudzwa,” vanodaro Gogo Muranda.
Vanotiwo vane kamwe kambo kavakatsikisa kanonzi Munotikoshera Mwari uye nziyo dzavaparura kusvika pari zvino dzinokwana shanu.
“Panziyo dzangu ndine vhidhiyo rimwe chete rekambo kanozi Munotikoshera Mwari uye ndinotarisira kuita mamwe akawanda. Ndinoita nziyo dzekurota ndichimuka ndoisa munhare kana kunyora pasi. Dzimwe nguva munzeve dzangu munouya mazwi enziyo ndotonyora pasi uye ndine dzakawanda dzandinadzo asi ndinokanganiswa chete nekushaya mari yekutsikisa.
“Nziyo dzandinadzo dzinokwana madambarefu mana,” vanodaro.
Gogo Muranda vanoti vanotsigirwa zvakanyanya nevana vavo, vasikana vaviri nevakomana vaviri, mubasa ravo rekuimba.
“Ndine vazukuru 13 avo vanofarira zvikuru nziyo dzangu. Ndine kamwe kambo kandakanyora kanotaura nekuda kwekutorwa kwezvinodhaka kakamirira kutsikiswa. Ndinewo chido chekubatana nevamwe vaimbi vane mukurumbira vanosanganisira Dorcas Moyo naJanet Manyowa,” vanodaro.
