Kwayedza
Kingstone Mapupu
MURUME anogara kwaMuzokomba, kwaMambo Nyashanu, kuManicaland, akaponda sekuru vake nekuvatema nedemo apo vaitsvaga huni mugomo reko.
Nyaya iyi yakaitika kumazuva rodoka musi wa22 Kukadzi mugomo reMasina apo vaviri ava vaitsvaga huni.
Mutauriri wemapurisa kudunhu reManicaland, Inspector Nobert Muzondo, vanoti vaviri ava vakabva kumba vachienda kunotsvaga huni kusango remugomo iri.
“Murume anonzi Evans Munyadzi (26) akatorana nasekuru wake, Dickson Muzokomba (32), ndokuenda mugomo reMasina umo vaitsvaga huni vachingova vaviri. Evans akazotema Dickson nedemo kamwe chete pamutsipa achibva angofira panzvimbo nekuda kwechikonzero chisina kuzivikanwa,” vanodaro Insp Muzondo.
Vanoti Evans akazosiya chitunha chasekuru vake mugomo achibva aenda kumusha uko akanotaurira Enough Muzokomba (26) kuti ainge aponda Evans nedemo.
“Nyaya iyi yakazotaurirwawo kuna Elasto Muzokomba, uyo akazonomhan’ara nyaya iyi kumapurisa eZimbabwe Republic Police (ZRP) epakamba yepaMuzokomba, avo vakabva vaenda kwaiva kwaparirwa mosva iyi,” vanodaro.
Mukuferefetwa kwenyaya iyi, vanoti hapana kubuda chikonzero chakaita kuti muzukuru uyu aponde sekuru vake.
Vanoti Evans akabva asungwa nekuda kwemhosva yaari kupomerwa yekuponda uyo akachengetedzwa muchizarira apo nyaya yake iri kufambira mberi nekuferefetwa.
“Mutumbi wemufi wakazoendeswa kumochari yechipatara cheBirchenough Bridge kunoongororwa, uye demo rakashandiswa kupara mhosva iyi rakawanikwa nemapurisa,” vanodaro Insp Muzondo.
Apo nyaya iyi iri kufambira mberi nekufeewa, Insp Muzondo vanoyambira ruzhinji kuti vasagadzirise nyaya dzavo nekurwisana kana kupondana sezvo zvichiwedzera matambudziko kumhuri dzavo.
“Kupondana vanhu vatadza kuwirirana munyaya dzakasiyana, kusanganisa kunangana huroyi, dziri kuwanda mudunhu redu reManicaland. Tinokurudzira vanhu kuenda kunozivisa nyaya dzinovanetsa kumapurisa, kumasabhuku nemadzishe kana kumafundisi emachechi. Dzimwe dzenyaya dzekupondana nekuda kwehuroyi dziri kubva pakunge vanhu vaenda kungava kudzin’anga kana kumaporofita uko vanosvikoudzwa kuti matambudziko avo anokonzerwa nedzimwe hama dzavo.”
Insp Muzondo vanoti maporofita nen’anga vari kukonzera kurwisana nekupondana kwevanhu mumhuri vanogonawo kusungwa vachiendeswa kumatare edzimhosva pamwe chete nevavanonyengera kuponda vacho.
“Upenyu hwemunhu hunokosha, ngatisatorei mitemo tichiisa muhomwe dzedu. Ngatizivisei nyaya dzedu kumapurisa tisasvika pakudeura ropa, kana madzimambo nevamwe vakuru vematunhu vanogona kubatsira kugadzirisa magakava,” vanodaro.
Vanoti kune nyaya yemukomana wekuBocha, kwaMarange ari kupomerwa kuponda ambuya vake amai vababa nekuvarova nematanda kusvikira vafa achivapomera kuroya.
“Chikumbiro chedu kumasangano anomirira maporofita nen’anga kuti vagare vachiunganidza varapi vechivanhu ava kuti vasiyane nekupesanisa mhuri nekunanga vanhu huroyi izvo zvinoguma zvakonzera kurwisana nekupondana. Mutemo wenyika haubvumidze kunanga munhu huroyi, inotori mhosva.
“Ngavaone kuti vanhu vose vanozviti in’anga kana kuti maporofita vaongororwa vopihwa matsamba eHurumende ekuita basa iri, vanenge vasina vosungwa,” vanodaro Insp Muzondo.
