Kwayedza
Chicken Inn
Dynamos
Highlanders
caps united
CHICKEN Inn ingakwanise here kuchengetedza mukombe weCastle Lager Premier Soccer League uyo wayakabvutira Dynamos mwaka wadarika?Uyu mubvunzo une vatsigiri venhabvu vakawanda zvichitevera kutatarika kuri kuita chikwata ichi mumitambo yacho yachatamba kusvika parizvino.
Chicken Inn yakatorera DeMbare mukombe uyu apo yairairidzwa naJoey ‘Mafero’ Antipas uyo akazobva kuchikwata ichi ndokuenda kuSouth Africa kwaari kutungamira AmaZulu.
Kubva kwakaita Antipas kwakaona Rahman Gumbo achigadzwa pachigaro chinopisa ichi.
Apo zvimwe zvikwata zvinoti FC Platinum, Highlanders, CAPS United neDynamos zviri mumakwikwi ekurwira mukombe uyu, Chicken Inn nekune rimwe haisi kutamba zvinodakadza.
Kubva mumitambo 12 yatambwa neChicken Inn kusvika parizvino, yakwanisa kuhwina mishanu, ikakundwa mishanu ndokuita mangange miviri.
Zvakadaro, obvunzwa nezvenyaya yekuti chikwata chake chinokwanisa here kuchengetedza mukombe wacho, Gumbo svondo rino haana kuda kutaura zvakawanda nezvenyaya iyi achiti ari kuita gadziriro dzemitambo yake.
“Handikwanise kutaura pamusoro penyaya iyi parizvino, ndiri kumbogadzirira mitambo yangu yesvondo rino,” anodaro Gumbo.
Kwayedza yakaita ongororo netsvakurudzo yekuona kuti ndezvipi zvikwata zvakahwina mukombe wePSL zvikakwanisa kuuchengetedza.
Nhorowondo yenhabvu yemuZimbabwe inorakidza kuti kubva mugore ra1980 zvikwata zvitatu chete zvinoti Dynamos FC, Highlanders FC neCAPS United ndizvo zvakakwanisa kurwira kuchengetedza mukombe wePSL mushure mekuuhwinha.
Dynamos 1980-83, 1985-86, 2011-14
Chikwata ichi chakahwina mukombe wePSL kana kakatevedzana mumakore anoti 1983 kusvika 1983 apo chairairidzwa naSunday Chidzambwa. Mugore ra1985, Dynamos yakahwina mukombe uyu ikazokwanisa kurwira kuuchengetedza muna 1986.
DeMbare yakazviita zvakare kubva 2011 kusvika 2014 apo Kallisto Pasuwa aive panyanga.
Highlanders 1999-2002
Highlanders ‘’Bosso’’yakanetsa kukunda kubva 1999 kusvika 2002 apo yakamborambira nemukombe uyu. Bosso ndiyo yega yakakwanisa kutevera mumatsimba eDeMbare nekuhwina mukombe uyu kana kakatevedzana.
cAPS United 2004-05
Kepe-kepe ndiyo yechitatu yakarwira kuchengetedza mukombe wayo wePSL apo yakarambira nawo mugore ra2005 ichirairidzwa naCharles Muhlauri.
Zvakadaro, kubva mugore ra1980 mukombe wePSL wakahwinwa nezvikwata 10 asi pari zvino zvina zvinoti Chicken Inn ‘Gamecocks’, Dynamos ‘DeMbare’, Highlanders ‘Bosso’ neCAPS United ndizvo zvega zvichiri kukwikwidza muligi iri.
Zvimwe zvitanhatu zvinoti Motor Action, Gunners FC, Black Rhinos, Black Aces, Zimbabwe Saints neAmazulu zvose zvakaburitswa muligi iri.
Pazvitanhatu izvi, zviviri zvinoti Black Rhinos neGunners FC zviri kukwikwidza muZifa Northern Region Division One kozoti Motor Action, Zimbabwe Saints, Amazulu, Black Aces neAmazulu zvose zvakaparara.
