Kwayedza
AKURUMA nzeve ndewako, varimi vefodya heunoi mukana wekuti munge muchizvirimira fodya yenyu yemhando yepamusoro kuburikidza nemadiridziro echitso-tsoka eMoneyMaker Max Pump.Mutengesi mukuru wemichina yemadiridziro aya, VaBrian Vere vanove managing director weBlagefields Marketing (Pvt) Ltd iyo inogadzira michina iyi, vanoti varimi vefodya havafaniri kusaririra mukupinda muchirongwa chemadiridziro ichi zvichitevera kusanduka kuri kuita mamiriro ekunze.
“Tiri kukurudzira varimi kuti vange vachichera matsime kana kuti migodhi kuminda yavo kuitira kuti panonaya mvura vawane nzvimbo dzekuchengetera mvura yemadiridziro.
“Migodhi iyi ngaive yakadzika zvakanyanya kuti igone kuchengeta mvura kwenguva ndefu.
“Mvura iyoyo ndiyo yavanozodhonza vachishandisa MoneyMaker Max Pump (chitsoka-tsoka) mukudiridzisa minda yavo. Michina iyi iri nyore kushandisa zvekuti unogona kudiridza uri wega munda wose pasina kudhurirwa nekuhaya vashandi uye haushandise simba rakanyanya,” vanodaro VaVere.
Vanoti murimi chake chaanoita kuradzika pombi mumunda unoda kudiridzwa iye achitsika-tsika pamushina kunge munhu anochovha bhasikoro mvura ichienda mumunda kusvika mwando wadzika pasi.
“Varimi vefodya tinoti uno ndiwo mukana wekuti munge muchishandisa mari dzeExport incentive kuti mutenge michina yeupenyu.
“Mvura inogona kunaya asi pane nguva yainogona kuenda kwemwedzi yakati kuti saka zvirimwa zvenyu hazvifaniri kuzoziya nezuva nekushaya mvura. Pane zvakare mikana yekuti munge muchitora mari dzezvikwereti kubva kumabhanga akasiyana munyika kuti mutenge michina yemadiridziro nenguva,” vanodaro.
VaVere vanoti varimi vanokwanisa zvakare kutenga michina yemadiridziro iyi vachishandisa Telecash panhamba dzinoti 0731 328 671 kana kuti neEcoCash nhamba dzinoti 0779 439 206.
