Kwayedza
Kingstone Mapupu
KAMBANI yeScientific Industrial Reasearch and Development Centre (Sirdc), iyo inouchika mbeu yezvirimwa zvakasiyana nekuita tsvakiridzo yekusimudzira mabasa ekurima, yakabura mbeu itsva nhatu dzechibage dzeSirda Maize idzo dzinonzi dzinoita zvakanaka zvikuru kumatunhu akasiyana enyika.
Mbeu itsva iyi inoti yeSirda 115, Sirda 117 neSirda 119 idzo dzose dzinonzi dzinoshingirira muzuva nekushandisa fetereza shoma kana dzichienzaniswa nedzimwe.
Mukuru anoona nezvekuvandudzwa nekuuchikwa kwembeu kuSirdc, Dr Tafara Matekaire vanova general manager kuchikamu cheZimbabwe Technological Solution, vanoti mbeu yavo itsva iyi inopa goho guru kana ichinge yarimwa zvakanaka.
“Mbeu itsva iyi inorwisana nekushaikwa kwemvura nezvirwere zvinosanganisira streak virus, grey leaf spot, maize leaf rust nekuoma kwemashizha yatinoti phaeospharia uyewo haidyiwe nezvipfukuto,” vakadaro Dr Matekaire.
Vanoti mbeu iyi inoibva mushure memazuva 136 uyewo inogona kuti ikarimwa zvakanaka inowanisa goho rinokwana matani 13 pamunda wakatandavara hekita imwe chete.
“Mbeu iyi inoita zvakanaka zvikuru kunzvimbo dziya dzisinganaye mvura inokwanirana, madzinde echibage ichi zvakare haakurumidze kupunzikira pasi sezvo akasimba,” vakadaro.
Kambani iyi yaingova nemhando yembeu imwe chete yeSirda 113 inoibvawo mushure memazuva 136.
Dr Matekaire vanoti mbeu yavo itsva iyi inowanikwa muzvitoro zvavanodyidzana nazvo zvakatekeshera nenyika.
“Tinouchikawo dzimwe mbeu dzezvirimwa zvinosanganisa nyimo, nzungu, bhinzi, mapfunde nemhunga.
“Tiri kubatsirawo varimi nekuvapa mbeu nefetereza avo vanosanganisira vekuHwedza, Chiweshe, Bindura, Goromonzi, Headlands, Mhangura, Zaka neMacheke.
“Mbeu yedu iyi iri kutambirwa zvakanaka zvikuru kuvarimi,” vakadaro.
