Kwayedza
SANGANO rakazvimirira reMusic Crossroads Zimbabwe rosimudzira vechidiki, kusanganisira vana vechikoro, vane zvipo zvekuimba nekuridza magitare kuburikidza nekuvadzidzisa.
Muhurukuro naMelody Zambuko anove mukuru wesangano iri, anoti rakavambwa mugore ra2007 nechinangwa chekuvandudza zvipo zvemazera akasiyana zvekuimba nekuridza midziyo ine chekuita nekutandadza veruzhinji yakadai sengoma, hosho nembira.
“Tinoshanda pamwe neNational Arts Council mukusimudzira vaimbi vechidiki, tichitsigirwa nesangano reSwedish International Development Co-operation Agency (SIDA) mukuita ongororo kuti tione hudzamhu hwehindasitiri yekuimba muraramo yevechidiki. Mugore ra2012, takatangisa kuitisa zvidzidzo zvekuimba nekuridza magitare uye tiri kuona kuti vechidiki vazhinji vave kusimukira zvakanyanya nekuti vamwe vari kuguma vaenda kunokwikwidza kunze kwenyika. Chirongwa ichi chinowanikwa munyika muno, Mozambique neMalawi,” anodaro.
“Vanenge vapedza zvidzidzo izvi, vamwe vacho vanowanikwa vachinofundisa muzvikoro zvakazvimiririra zvakadai sanaGateway uye vamwewo vanovandudza dzidzo yavo kumayunivhesiti akaita seMidlands State University. Pano hatiite zvemabhuku zvakanyanya, tinofundisa vanhu mabasa emawoko kuti vagone kuimba nekuridza magitare zvine hunyanzvi,” anodaro Zambuko. Anoti vane chirongwa chinodaidzwa kunzi Children’s Inspire icho vanoita kuti vechidiki vasangoona nyaya dzekuimba sedambe asi kuti vadzitore sebasa rinopa chouviri.
“Tine vamwe vatakafundisa nyaya dzekuimba avo vave kutowana makondirakiti ekunoridza kunze kwenyika izvo zvinoita kuti nyika inge ichisimukira munyaya dzeupfumi nekuti vanenge vachiunza mari yekunze muno. Vamwe vatiri kushanda navo vana vari muzvikoro uye vemachechi,” anodaro. Vanokwanisa kuwana mukana wekudzidza nyaya dzekuimba nekuridza magitare nesangano iri ndevaye vakabura zvidzidzo zvitatu paO-Level, pamwe nechiRungu.
