Kwayedza
Abel Ndooka
VARAIRIDZI venhabvu vanomwe venyika dzakabuda mumakwikwi eFIFA Qatar 2022 World Cup vakatosiya basa zvichitevera kukundwa kwakaitwa zvikwata zvavo.
Apo mitambo yeWorld Cup yegore rino yasvika pamasemi-final iyo ichaona zvikwata zvinoti Argentina ichisangana neCroatia uye France ichitamba neMorocco, varairidzi vanomwe vaive kumutambo uyu vakatosiya basa nezvikonzero zvakasiyana zvichitevera kuburitswa kwakaita zvikwata zvavo kuQatar.
Murairidzi weMexico – Gerardo “Tata” Martino – ndiye akaita wekutanga “kurova pasi” pakaburitswa chikwata chake icho chakatadza kubuda muboka racho muGroup C umo maive nezvikwata zvinoti Argentina, Poland neSaudi Arabia.
Argentina bedzi ndiyo yasara muGroup C.
Martino akateverwa naRoberto Martinez uyo airairidza Belgium akasiyawo basa kuchikwata chemaRed Devils apo chakatadza kubuda muboka racho reGroup F umo maive nezvikwata zvinoti Morocco, Croatia neCanada.
Morocco neCroatia dzichirimo kubva muGroup F.
Roberto Martinez
Belgium ichienda kumutambo weWorld Cup, chikwata ichi pasi rose chaive chakagara pachidanho chechipiri panyika dzinotamba nhabvu, asi kuWorld Cup yakangokwanisa kuhwina mutambo mumwe, ikakundwa mumwe 2-0 neMorocco ndokuzoita mangange 0-0 neCroatia izvo zvakaona ichidzokera kumusha. Pakapera mutambo weCroatia, Martinez akazivisa kuti haasi kuzoenderera mberi ari murairidzi wenyika iyi.
Aive murairidzi weGhana – Otto Addo – akaita murairidzi wechitatu kusiya basa rake zvichitevera kutadza kubudirira kwakaita maBlack Stars kubuda muboka ravo muGroup H.
Otto Addo
Ado akataura kuti ari kusiya basa iri kuti adzokere kuGermany kunoshanda basa rake iro ange achiita kuchikwata cheBorussia Dortmund sa“talent coach”.
Ado akataura achiti aive ane chitsidzo chekuti World Cup painopera aizosiya basa rekurairidza Ghana kunyangwe ikasimudza mukombe uyu.
Zvichitevera kuburitswa kwakaita Korea Republic muRound of 16 neBrazil mumutambo uyo yakakundwa 4-1, murairidzi weKorea Republic, Paulo Bento akabva akandawo mapfumo pasi.
Paulo Bento
Paulo Bento achisiya basa, Luis Enrique akabva amutevera uyo akadzingwa neSpain zvichitevera kukundwa kwakaita La Roja neMorocco.
La Roja yakaburitswa nemaAtlas Lions mumapena sezvo mutambo wezvikwata zviviri wainge wapera uri mangange 0-0.
Enrique akabva atsiviwa naLuis de la Fuente uyo ange achirairidza chikwata cheSpain Under-21.
Luis Enique
Enrique achingodzingwa, akabva ateverwa naTite weBrazil uyo akasiya basa maawa maviri chikwata chake chaburitswa muquarter-final yemutambo weWorld Cup neCroatia.
Chikwata chemaSamba Boys chaitarisirwa zvakawanda kuQatar sezvo change chizere nevatambi vane mukurumbira, asi chakadzorerwa kumusha neCroatia izvo zvakatuma Tite kusiya basa.
Tite
Murairidzi wechinomwe kusiya basa ndiLouis van Gaal uyo ange achiraidza Netherlands.
Louis van Gaal
Van Gaal akasiya mushure mekunge chikwata chake chaburitswa muquarter-final neArgentina uye akabva atotsiviwa naRonald Koeman uyo akamborairidza chikwata ichi kare.
