Kwayedza
Abel Ndooka
CHIKWATA cheZimbabwe Cricket chiri mukembi umo chiri kugadzirira kuenda kumutambo weInternational Cricket Council World Cup uyo uchatambirwa kuAustralia neNew Zealand muguva pfupi iri kutevera. Mutambo uyu unotarisirwa kutanga musi wa14 Kukadzi uchizopera 29 Kurume.
Parizvino chikwata ichi chiri kuita gadziriro dzacho kuHarare Sports Club chakamirira kuenda kuNew Zealand uko chichanotamba mitambo mina yekugadzirira, miviri yacho yakarongwa nesangano reICC.
Gore rino Zimbabwe yakaiswa muboka rechipiri muPool B umo ichabandana nezvikwata zvinoti South Africa, India, Pakistan West Indies, Ireland neUnited Arab Emirates.
Mitambo yeZimbabwe ichatanga musi wa15 Kukadzi apo ichasangana neSouth Africa kuSeddon Park, Hamilton kuNew Zealand.
Zimbabwe ichange ichitungamirirwa naDav Whatmore uyo akagadzwa pachigaro chinopisa nguva yadarika zvichitevera kudzingwa basa kwakaitwa Steve Mangongo.
Mukushi wemashoko weZC, Lovemore Banda, anoti chikwata chaWhatmore chiri kushanda nesimba mugadziriro dzacho dzekuenda kumutambo uyu uko chinofanirwa kurohwa semvumba kana chichida kuhwina.
Anoti parizvino vatambi vese vari kubva kudzimba dzavo vachisangana paHarare Sports Club apo pavari kuita gadziriro dzavo.
Banda anoti Zimbabwe haina kuronga mitambo yehushamwari yekushandisa segadziriro muno.
“Chikwata chedu chiri kugadzirira zvakasimba chakatarisana nemutambo weWorld Cup uyu.
“Vatambi vese vari kutirena vachibva kudzimba dzavo uye tiri kutarisira kuti patichavatumira kuNew Zealand vachanotamba mitambo yekugadzirira mina.
“ICC iri kurongawo mitambo miviri iyo tichatamba neNew Zealand uye neSri Lanka senzira yekugadzirira mutambo uyu.
“Asi chikwata chedu chiri kufanirwa kutokunya zvakasimba kuti chihwine tigobudirira kufambira mberi kubuda muboka redu,” akadaro Banda.
