Kwayedza
Yoliswa Dube-Moyo
CHIRWERE cheCovid-19 hachifanirwe kukanganisa zvirongwa zvekurwisa HIV kuitira kuti Zimbabwe ikwanise kuzadzikisa zvinangwa zvekupedza kupararira kweAIDS panosvika gore ra2030.
Chinangwa chechitatu cheSustainable Development Goal (SDG) chine donzvo rekupedza HIV neAIDS panosvika 2030 izvo zvinonzi nenyanzvi dzezveutano zvinokwanisika kuzadzikiswa kana kutapurirwa kutsva nendufu dzinodyidzana nedenda iri zvikadzikira nechikamu che90 percent pakati pegore ra2010 nera2030.
Kusvika pari zvino, kudzikira kuri kuita huwandu hwevari kufa neAIDS kunoratidza kuti kuri mugwara sezvinotarisirwa, apo kudzikira kwekutapurirwa kwehutachiona hutsva kwakanganiswa nechirwere cheCovid-19, pakati pezvimwe.
Vachitaura pakugashidzwa kwemabhasikoro anosvika 119 nesangano reNational Aids Council (NAC) kuvashandi vemunharaunda senzira yekuvatsigira muchirongwa chekurwisa kupararira kweHIV kudunhu reMatabeleland South – Mambo Masuku – vanoti Covid-19 haifaniri kukanganisa kuzadzikiswa kwezvinangwa zvekupedza kupararira kweAIDS panozosvika gore ra2030.
“Kuuya kweCovid-19 kwaita kuti pasave nekutariswa kwakanyanya kwezvimwe zvirwere zvatagara tichirwisa senyika.
“Kune dzimwe nzvimbo, vanhu vave kuratidza kushaya hanya pamusoro pekuzvidzivirira kubva HIV neAIDS. Vanhu vanofanira kunzwisisa kuti kutanga kweCovid-19 hakuna kupedza denda reHIV neAIDS.
“Vanofanirwa kuramba vachizvidzivirira uye kutora matanho ekuderedza kutapurirana HIV,” vanodaro Mambo Masuku.
Vanoti zvakakosha kuti nharaunda dziyeuchidzwe kuti HIV neAIDs zvichiriko uye panofanirwa kutorwa matanho ekuzvirwisa.
“Zvakakosha kuti vanhu varambe vachizvidzivirira kubva kuHIV neAIDS sezvavaiita kare chirwere cheCovid-19 chisati chavepo,” vanodaro Mambo Masuku.
VaIsaiah Abureni vanove maneja weNAC kuMatabeleland South vanoti dunhu ravo rave nebudiriro huru panyaya yekurwisa kupararira kweHIV neAIDS.
“Tiri kuona zvibereko nekuda kwekuzvipira kwevashandi vemunharaunda mudunhu redu,” vanodaro.
Vanoti NAC yakatora vamwe vashandi vemunharaunda vanodarika 600 avo vakakosha panyaya yekurwisa kuparira kweHIV mudunhu iri.
