Kwayedza
Kingstone Mapupu
VARUME vaviri vanonzi vange vanetsa nekubira vanamuzvinhabhizimisi neveruzhinji vakapakata pfuti kwaChilonga, kuChiredzi, vakasungwa.
Tobias Chidavaenzi (54) wekwaSabhuku Musariri, kwaMambo Nyakunhuwa kuZaka, naLeonard Muzenda (20) wekwaSabhuku Lisimati kwaMambo Chilonga, kuChiredzi, vakasungwa vachipomerwa mhosva dzakasiyana dzekuba.
Inspector Kudakwashe Dhewa, avo vanova mutauriri wemapurisa kudunhu reMasvingo, vanoti nemusi wa24 Kurume nenguva dza8 manheru, Tariro Mafodya (27) anoshanda muchitoro paRockman Investments kuChiredzi akaenda kunorara kuimba yekuseri kwechitoro.
“Nenguva dza01.50 hours nemusi wa25 Kurume, varume vaviri ava vanonzi vakanopwanya dhoo repamba panorara musikana uyu ndokupinda uye ndokumunongedzera pfuti vachimuti avape mari. Makororo aya anonzi akatora mari inosanganisira ZAR 1 000, magirosari anokosha ZAR 295, nhare yeSamsung J4 yaiva nemutsara weEconet inokosha ZAR 1 200,” vanodaro Insp Dhewa.
Nyaya iyi yakazomhan’arwa kumapurisa, vaviri ava vachibva vasungwa.
“Tinotenda veruzhinji nekuda kwemashoko akawaniswa kumapurisa akazoita kuti vaviri ava vasungwe. Mapurisa vakazokwanisa kuwana chombo chakashandiswa mukuba inova pfuti uyewo zvakazobuda kuti vaviri ava vanonzi vakaparawo dzimwe mhosva nonwe dzekuba vakapakata zvombo,” vanodaro Insp Dhewa.
Vanokurudzira varidzi vezvitoro kuchengetedza zvivakwa zvavo nevarindi vakapata zvombo kuti vasabirwe.
“Makororo arura nekudaro tinokurudzira varidzi vezvitoro kupinza mabasa magadhi anorara achichengeta zvivakwa nepfuma yavo. Tinotendawo veruzhinji nekuramba vachipa mashoko anoita kuti makororo asungwe,” vanodaro Insp Dhewa.
Vanoyambira makororo asati asungwa kuti ruoko rwemutemo ruchasvika kwavari chete voendeswa kumatare edzimhosva nekumajeri anokodzerana navo.
