Kwayedza
Danisa Masuku ari kuBULAWAYO
MURUME anogara mumusha weTshabalala, kuBulawayo anoti agere muchoto chaimo nemudzimai wake uyo anomuoneka kuti achambonoona zvikomba zvake, kana odzoka kumba ouya nazvo uye iye akasimudza musoro obva adhonorwa kurohwa — ari pamba pake.
Nhlanhla Ndlovu anoti amboshingirira nekushungurudzwa uku asi nekuda kwekuti zvanyanya, afunga kuzvifumura uye akatonopotera kudare redzimhosva achitsvaga kudzivirirwa kuti asarambe achidashurwa pamwechete nekutukwa.
Ndlovu akatokwidza nyaya yekushungurudzwa kwake kudare redzimhosva reWestern Commonage Court achiti mudzimai wake Memory Moyo anoti kumutuka uye kumukutsirana kumurova nezvikomba zvake izvo anouya nazvo pamba pavo.
Mudzimai wake Moyo haasi kuramba kuti anounza zvikomba pamba asi kuti anoti, “Usaite seusingazive kwandinenge ndiri . . . inga ndinokuoneka wani uye boyfriend yangu yacho unotoiziva iwe?”
Moyo unoudza dare pasina kana kunyara kuti, “Ndakangounza boyfriend yangu kumba kwedu kamwechete uye murume wangu aivepo uye agara anotomuziva. Murume wangu ndakangomurova kamwechete mushure mekunge andibvunza kwandainge ndaenda nechikonzero chekuti pandakaendako ndakasiya ndamuudza kuti ndichambonoona chikomba changu.”
Asati akwidza nyaya iyi kudare, Ndlovu anoti ange achingokuvara chinyararire netsika yemudzimai wake yekuuya nezvikomba kumba kwavo iye aripo.
Anoti pose paanotsiudza mudzimai wake, anobva atanga kumutukirira nekumuzvambaradza kumurova pamberi pezvikomba izvi.
Sezvinonzi zvaari kuitirwa zvishoma, Ndlovu anotizve mudzimai wake anogaromuyambira kuti anoda kumusungisa izvo zvinoita kuti iyewo abva angogara achikuvarira mukati.
Asi nemusi weMuvhuro svondo rapera, murume uyu akazorovera mwoyo wake kudombo ndokukwidza nyaya kumatare achiti anzwa nekushungurudzwa naMoyo zvose panyama nemupfungwa.
“Ndinokumbirawo gwaro rinondichengetedza kubva mukushungurudzwa nemudzimai wangu Memory Moyo. Ari kundishungurudza zvose panyama nepamweya.
“Anounza zvikomba zvake kumba kwedu ini ndiripo, ndikangosimudza musoro obva andidhonora kundirova zvikomba izvi zviripo,” Ndlovu anoudza dare iri.
Ndlovu anoti akangotsiudza Moyo bedzi anobva audzwa magaramwoyo zvose nekuzvindikitwa kurohwa.
“Anobva ashatirwa otanga kundirova zvikomba zvake zviripo. Kwava nemwedzi achindidaro. Ndinotoshamisika kuti anoti anoda kundisungisa pasina chikonzero.
“Ndinokumbira kuti dare rino rindinunure nekumisa mudzimai wangu kuti asauye nezvikomba zvake kumba kwedu uye asandirove,” anodemba Ndlovu.
Ndipo panobva papindurwa nemudzimai uyu achiti akangounza chikomba ichi kamwechete kumba kwavo murume wake aripo uye “anotoiziva boyfriend yangu yacho. Ndakakurovera kuti waindibvunza zvaunoziva.”
