Kwayedza
Chirevo chinoti “dira rizare” chiri pamiromo yevakawanda mazuva ano. Kwayedza inokupai detembo “Dira Rizare” iro rakanyorwa nanyanduri wechidiki, Fungai “Superlady” Jayaguru uyo anobva kuGweru asi pari zvino ari kuSouth Africa.
Poet: Fungai Jayaguru/ Superlady
Title: DIRA RIZARE
Dira zvako rizare sahwira,
Usazeza ndinokakata chero rakavira,
Ungwarire kana ndadhakwa vasazondibira,
Chigara nechepapa ndimbokupira dzinorira sembira,
Dira hama, dira rizare!
Tete ndokubva pano vakasviba serima,
Pakudzoka wanei vatsvuka sehwakwa,
Mubvunzo woti akavafundika ndianiko, sei?
Kutsvuka vakura semichero here imi,
Dira hako sahwira, dira rizare!
Zuro mbuya kutimutsa nemhere usiku,
Zvanzi sekuru havasati vadzoka kudonje kwaShiku,
Isu rarirei kutsvaga shasha semombe,
Wanei mukuru achitamba kanjiva netunzenza kubhawa,
Kutodana zvikanzi handisi sekuru, ndiri blesser,
Manyariro acho kani sahwira,
Aewa, dira rizare!
Ko zvatakazombonyeya Chihera kurwizi,
Fume mangwana tosangana naye kuhuni,
Gotwe rangu ndokubvunza aripo,
“Ndiye here wamaiti anonhuwa nezuro”?
Yakaguma yave bata wabata mubanimo,
Dira sahwi, dira rizare!
Zvandakabatikidzwa ndichiedza bhutsu dzevaenzi pamusuwo,
Kuwanikwa zvangu ndichiwedzera mvura yesadza ndashanya,
Aewazve sahwira, chirega kuseka zvinondibata,
Ndakashaura parufu pakashaya akabvumira,
Kupopotera saga pamusangano wanei harisi rangu,
Ndakamborara muchechi ndikapepuka kuchinzi simukai,
Kutosimuka ndichizvida ndega wanei nyika yanditarisa,
Ko ndaizivei kuti muparidzi vange vati varoi simukai mutendeuke,
Ndakashaya pekunyarira mhoti,
Dira zvako rese, dira rizare!
Uchayeuka here ndichiti ini nemudiwa wangu tinosvika kure?
Nditambire zvako sahwira ndadzoka ndega,
Ndichimuda munhu nenduru nechikanganwahama,
Iye zvake achindiona sefuza rinovenga hama,
Kuita kundisakadza moyo nemisodzi,
Ipapo ndaakugona kubika nechitofu chake chinogwinha,
Mufoni mangu ainzi ‘Wepamoyo’ ini make ndakanzi Juri wekwana Jojina,
Aewa zvanhasi rega ndidhakwe,
Dira mwana wevhu, dira ripfachukire
Usazeza zvako,
Dira kani, dira rizare! – (PHILLIPA MUKOME-CHINHOI)
