Kwayedza
Danisa Masuku
MUDZIMAI wekumindamirefu yekuWoodville, kuBulawayo akamiswa pamberi pemutongi Nomasiko Ndlovu wedare reTredgold Magistrate’s Court nemhosva yekuisira muchetura mbudzi nhanhatu dzemuvakidzani wake zvikaita kuti mbiri dzacho dzife.
Busisiwe Hove (71) anoramba mhosva iyi uye nyaya yake ichaenderera mberi nekutongwa munguva pfupi inotevera apo anenge achibva kumba mushure mekubhadhariswa mari yebhera.
Siduduzile Phiri (46) naHove vavakidzani kuWoodville.
Dare rakaudzwa kuti mbudzi dzaPhiri dzaigara dzichipinda mumunda waHove izvo zvaisamufadza zvachose.
Hove anonzi akaisa muchetura mumvura uye mbudzi dzemuvakidzani wake idzi padzakapinda mumunda wake, akabva adzipa mvura iyi.
Mushure mekunge dzanwa mvura iyi, mbudzi mbiri dzaPhiri dzakabva dzatanga kurwara ndokubva dzafa. Hazvina kugumira ipapo sezvo dzimwe ina dzakabva ndatangawo kurwara zvikadziita kuti dzikuvarire mukati.
Nyaya iyi yakamhan’ara kumapurisa zvikaita kuti Hove asungwe.
