Kwayedza
Abel Ndooka
CHIKWATA cheCheziya Gokwe High chevakomana necheLiebernberg High chevasikana chekuChivhu ndizvo zvakahwina mibairo mikuru yeCrystal Candy National Chess League Finals iyo yakatambirwa paCornelius Hope Academy kuGoodhope, muHarare svondo radarika.
Mutambo uyu waive nezvikwata 64 zvakabva kumapurovhinzi ese munyika uye zvaive zvakaiswa mumapoka mana anoti Secondary Boys, Secondary Girls, Primary Boys nePrimary Girls.
Chikwata chega-chega chaive nevatambi vashanu uye boka rimwe nerimwe riine vatambi 16.
Cheziya Gokwe High yakapedza iri pamberi pezvikwata zvinoti Mbizo High School iyo yakatora nhamba yechipiri ndokuhwina menduru yesirivha uye neAssis yakapedza iri pechitatu.
Kuzvikwata zvesekondari zvevasikana, Liebernberg yaive pamusoro pezvimwe zvikwata zvinoti Girls High yaive pechipiri neGokwe High yakapedza iri pechitatu.
Kuzvikwata zvevakomana zvepuraimari, Runyararo Primary ndiyo yakahwina mubairo mukuru ichiteverwa neBudiriro Primary yaive pechipiri, kuchiti St Noah yakapedza iri pechitatu.
Mumitambo yevasikana vepuraimari, Runyararo ndiyo yakaenda nemukombe, ichiteverwa neMother Touch kuchiti Haig Park ikapedza iri pechitatu.
Liebernberg High
Akafanobata chigaro chemutungamiri weZimbabwe Chess Federation – Muchakanakirwa Mkanganwi – anoti mutambo uyu wakafamba zvinodadisa izvo zvinorakidza kuti uri kugamuchirwa muzvikoro.
“Tinonzwa manyukunyuku nekufamba zvakanaka kwakaita mutambo wedu weCrystal Candy National Schools Chess League, tinoda kutenda vakotsveri vedu nekutsigira kwavakaita uye zviri kubatsira kushandura mafambiro anoita mutambo uyu munyika.
“Tinonzwa kufara tichiona vatambi vechess vakauya kuzokwikwidza mumutambo uyu, tinovakurudzira kuti vave nehunhu hunoyemurika pazvose zvavanoita nekuve vamiriri vechess kwose kwavanofamba.
“Tinovakurudzira kuti vadzidzise chess kushamwari dzavo uye rudo rwemutambo uyu munyika yese.
“Mukupedzisira, tinotenda zvikoro nevarairidzi vakafamba nevana vedu kuuya kuzokwikwidza mumutambo uyu,” anodaro Mkanganwi.
Zvikoro zvakahwina mumutambo uyu zvakawaniswa mikombe, menduru, mabhodhi echess pamwe nemahamper eCrystal Candy.
