Kwayedza
ZVIKWATA zvemutambo webeach volleyball zvakasangana svondo radarika kwaMachipisa kuHighfield, muHarare apo paiumbwa chikwata cheZimbabwe chichanokwikwidza kumutambo All Africa Qualifier uko chichange chichirwira tikiti rekuenda kumutambo weAll Africa Games.
Zvikwata 17 zvaiti 10 zvemadzimai pamwe nezvinomwe zvevarume zvaibandana zvakasimba mumutambo weZimbabwe Beach Volleyball Open Tournament uyu.
Mutambo wemaAll Africa Games uchaitirwa kunyika yeCongo-Brazzaville muna Gunyana.
Asi kuti Zimbabwe iende kumutambo uyu inofanirwa kutanga yahwina kumaAll Africa Qualifier ayo achatambwa muna Kukadzi.
Murairidzi weZimbabwe arizve mumwe wevatambi vebeach volleyball, Nyashadzashe Takawira, anoti chikwata chavo chine gomo guru rekukwira kuti chiende kumutambo uyu.
Takawira anoti chikwata chavo chine mukana mukuru wekuenda kumutambo uyu saka vanofanirwa kusunga dzisimbe pavachaenda kumaAll African Qualifier.
Mutambo uyu uchatambwa mwedzi unotevera asi hausati wave kuzivikanwa kuti uchatambirwa kupi.
“Tine basa guru rekubata rekuumba chikwata chedu chakasimba icho chatinoda kuzotumira kumutambo weAll Africa Games. Tinoda chaizvo kutumira chikwata chedu kumutambo uyu.
“Isu tatotanga gadziriro dzedu nekuti mwedzi unotevera tichanokwikwidza kumutambo weAll Africa Qualifier uko zvikwata zvichahwina ndizvo zvinobva zvatambidzwa tikiti rekunokwikwidza kumaAll Africa Games,” akadaro Takawira. Anoti vakatambi vakatamba zvinodakadza svondo rapera vachavarongera mimwe mitambo muno apo vachange vachihwina zvibodzwa uye achawana zvibodzwa zvakawanda anobva apinda muchikwata cheZimbabwe.
“Hatisati tave nechikwata izvezvi asi tichiri kuchivaka, tiri kuongorora vatambi vedu vese uye tichipa vamwe mukana.
“Vatambi vese vachange vachirwira zvibodzwa saka avo vanowana zvibodzwa zvakawanda tichivatora totanga kushanda navo zvakasimba kusvika tatanga kugadzirira kuenda kumaAll Africa Games,” akadaro Takawira.
