Kwayedza
Muchaneta Chimuka
VATORI venhau vanoshandira kambani huru mune zvenhau munyika muno yeZimpapers vakakumba mibairo pamakwikwi echikamu chepiri ekunyora nhau dzezvekurima (2nd Edition Zimbabwe Agriculture Media Awards (ZAMA) ayo akaitwa muguta reHarare svondo rapera achitsigirwa nesangano reZimbabwe Agriculture Society (ZAS).
Muchaneta Chimuka, uyo anonyorera bepanhau reKwayedza, akakumba mibairo miviri inoti weClimate Change and Sustainable Agriculture uye weAgriculture Equipment, Irrigation, Storage and Mechanisation.
Hakasi kekutanga Chimuka achihwinha mibairo yerudzi urwu sezvo akahwinha mimwe miviri zvekare inosanganisira wekurimwa kwembesa diki (Small Grains Sector) uye kuchengetwa kwemombe (Beef and Dairy Sector) gore radarika.
Vamwe vashandi veZimpapers vakapihwa mibairo zvondo rapera vanosanganisira Dumisani Nsingo uyo akaita 1st runner-up pachikamu cheAgriculture Equipment, Leeroy Dzenga weZimpapers Television Network (Agriculture Financing), Stanford Chiwanga 1st runner-up pamubairo wekuchengetwa kwemombe, Dumisani Nsingo (Beef and Dairy Sector), Oliver Kazunga (kurimwa kwefodya) naSydney Mubaiwa akawana mubairo wekurimwa kwemupunga negorosi.
Zvichitevera kunyuka kwechirwere cheCovid-19, makwikwi egore rino akava nemusiyano sezvo akaitwa padandemutande reFacebook senzira yekuderedza nyaya dzekuungana kwevanhu.
Vachitaura pachiitiko ichi, gurukota rezveminda, kurima, mvura nekusimudzirwa kwemaruwa, Dr Anxious Masuka — avo vaive muyenzi mukuru — vanoti makwikwi egore rino akaitirwa pamasaisai senzira yekuderedza kutapuriranwa kweCovid-19.
“Ndinotenda sangano reZimbabwe Agriculture Society (ZAS) nekuronga makwikwi aya. Kunyangwe zvazvo vari kusangana nezvinovaomera nekuda kwechirwere cheCovid-19, vakakunda kuita makwikwi aya.
“Segurukota idzva, ndinofara zvikuru kushanda ndichitsigirana nevatori venhau vanonyora nezvekurima.
“Chikamu che70 percent chevanhu muZimbabwe vari mumabasa ekurima zvinova zvinobatsira mukusimudzira upfumi hwenyika uye kuti tikwanise kuzadzikisa zvinangwa zveHurumende zvegore ra2030,” vanodaro.
Vanoti vatori venhau vakakosha zvikuru mukufambisa mashoko ekurima kuvarimi mumatunhu uye nenzira dzakasiyana.
Munyori mukuru kubazi rezvekuburitswa kwemashoko nenyaya dzenhepfenyuro, VaNick Mangwana vanoti zvinhu zvizhinji zvinosanganisira chikafu uye mbatya zvinobva kumabasa evarimi nokudaro ibasa revatori venhau kuti zviburitswe pachena kuti vakwaniswe kutsigirwa.
“Gore rapera, takaita dambudziko redutu remhepo uye mafashamu eCyclone Idai zvinova zvakakanganisa varimi vazhinji mudunhu reManicaland nokudaro kusanduka kwemamiriro ekunze uku kunokanganisa nyaya dzekurima zvikuru zvichiunza nzara. Kuti nyika ive negadziriro, vatori venhau vane basa guru rekuburitsa pachena zvose izvi,” vanodaro.
Gore rino, makwikwi aya akaitwa pasi pedingindira rinoti “Kutsigira raramo, Kunopa Budiriro Inoendeka”.
