Kwayedza
Abel Ndooka
MWAKA wenhabvu wa2024 uchatanga svondo rinotevera apo pachaona shasha dzeCastle Premier Soccer League (PSL) – Ngezi Platinum Stars – ichitatsurana nenyanzvi yeChibuku Super Cup, Dynamos FC, mumutambo weCastle Challenge Cup.
Mutambo uyu unorongwa nePSL kuti utambwe nezvikwata zvinenge zvahwina mukombe wePSL neweChibuku Super Cup mumwaka wadarika.
Mwaka wa2023, Ngezi Platinum Stars kana kuti Madamburo ndiyo yakasimudza mukombe wePSL uyo yakatorera FC Platinum yange yave nemakore mana ichingosimudza mukombe uyu.
DeMbare iri kupinda mumutambo uyu zvichitevera kukunda kwayakaita Madamburo 2-0 pamusha payo kuBaobab Stadium.
Takesure Chiragwi
Kuhwina kwakaita Madamburo chikwata chaTakesure Chiragwi mukombe wePSL, kwakabva kwaunza tikiti rekukwikwidza mumatambo mukuru wemuAfrica weConfedaration of African Football (CAF) Champions League.
Nerimwe divi, DeMbare, iyo iri kurairidzwa naGenesis ‘Kaka’ Mangombe, ichakwikwidzawo mumutambo weCAF Confederations Cup zvichitevera kuhwina kwayakaita Chibuku Super Cup.
