Kwayedza
SHANGWITI yemujaho wekumhanya, Jessica Ennis-Hill, oti ava kudzoka kuzopinda mumijaho zvichitevera kumbozororora kwaakamboita kwemakore angangosvika maviri mushure mekusununguka mwanakomana wake, Reggie. Ennis-Hill (29), uyo anove shasha yekusvetuka zvakare, achange achipinda mumujaho wekumhanya pamwe nekusvetuka kumakwishu eGreat CityGames.
Imwe nyanzvi yemujaho zvakare, Katarina Johnson-Thompson (22), achapinda mumijaho ichaitwa mumugwagwa mukuru wekuManchester weDeansgate musi waChivabvu 9.
Ennis-Hill anoti atononokerwa nekudzoka mudariro uye anoda kudzoka zvine mutsindo.
Chizvarwa chekuSheffield, Ennis-Hill, akapedzisira kupinda mumakwikwi pamhemberero dzeAnniversary Games idzo dzakaitirwa kuLondon muna Chikunguru 2013 apo akaita nhamba 4 mumujaho wekumhanya nekusvetuka mamita100.
Vatsigiri vanodarika 25 000 vachaona kudzoka kwake mumakwikwi aya.
Johnson-Thompson, uyo ari kusimukira zvakanyanya munyaya dzemijaho, akaratidza kuti ishasha yemhando yepamusoro panguva iyo Ennis-Hill ainge ari pazororo.
Chizvarwa chekuLiverpool, Johnson-Thompson, akadarika chikero chakambosvikwa naEnnis-Hill pakusvetuka, kumhanya pamwe nekukanda (discus) apo akawana mapoinzi 4 965 mumijaho yakasiyana. Mudzimai uyu akasvitsa zvakare mapoinzi 5 000 kumakwishu eEuropean Indoor Championships ayo akaitirwa kuPrague. — BBC Sport.
