Kwayedza
Abel Ndooka —
MUTUNGAMIRI wesangano reZimbabwe Softball Association, Stonard Mapfumo, anoti vari mushishi yekuita gadziriro dzekunokwikwidza kuTokyo 2020 Olympic Games.
Mapfumo achangobva kumusangano mukuru wakaitirwa kuSouth Africa weWorld Baseball Softball Confederation Summit uyo waive wakananga kutsvaga nzira dzekusimudzira mutambo uyu.
Mapfumo anoti apo Zimbabwe yakatarisana nemitambo yeTokyo 2020 Olympic Games panodiwa kuzivikanwa kuti zvikwata zvichanokwikwidza zvicharwira sei tikiti rekuenda kuJapan.
“Pandakaenda kumusangano mukuru kuSouth Africa weSoftball takanoisa zvichemo zvedu zveZimbabwe zvinosanganisira rutsigiro rwekusimudzira mutambo uyu muno.
“Chimwezve chikuru ndechekuti tinoda kuziva kuti apo tatarisana nemitambo yekugadzirira kuenda kumitambo ye2020 Tokyo Games, zvikwata zvichaenda kumitambo iyi zvichakwikwidza sei kuti zvigohwina tikiti rekuenda kumitambo iyi,” anodaro Mapfumo.
Zvakadaro, musangano weWBSC uyu – uyo wakaitirwa kuJohannesburg – wakapindwa nenhengo dzakabva kunyika 33, kusanganisira mutungamiri wesangano iri, Riccardo Fraccari.
Gore radarika, sangano reInternational Olympic Committee rakazivisa kuti mitambo yesoftball nebaseball ichange yave kukwikwidzwa kuOlympic Games kutanga 2020 kuTokyo, kuJapan.
