Kwayedza
Canditar Chapanduka
KUMATIVI ose enyika kunotarisirwa kuti kuchange kusina mvura inonaya panguva yeKirisimasi nekudaro vanhu vanokwanisa kuita mitambo yavo semichato vari panze, rinodaro bazi rinoona nezvemamiriro ekunze, reMeteorological Service Department (MSD).
Mumazuva mashoma apfuura, nzvimbo zhinji dzenyika dzanga dzichinaya mvura.
Kunyangwe zvazvo kunaya kwemvura kwakakosha kuvarimi nevamwe vari muchikamu chezvekurima, kune vanoda mabiko nevari kuronga zviitiko zvekunze panguva yeKirisimasi, zvinokanganiswa nemvura kana kukanaya.
Vanhu vazhinji vanga vachinetsekana nemamiriro ekunze vakatarisa mitambo yavakaronga pazororo reKirisimasi.
MSD inovimbisa avo vari kuronga mitambo yakasiyana kuti havasi kuzovhiringwa nemamiriro ekunze mukupera kwesvondo.
Bazi iri rinoti mamiriro ekunze achange akanaka kune vari kuronga zviitiko zvekunze.
“Nhau dzakanaka kune avo vari kuronga zviitiko zvekunze svondo rino reKirisimasi, kunaya kwemvura kuri kudzikira apo zuva iri raswedera,” inodaro MSD.
“Kunze kunotarisirwa kunge kuine makore mangwanani kuMatabeleland South, Bulawayo Metropolitan, kumaodzanyemba kweMidlands, Masvingo nekuchamhembe kweManicaland.
“Zvisinei, makore aya anotarisirwa kuzoparara zuva richizopisa munguva dzemasikati. KuMatabeleland North, kunotarisirwa kunge kwadzikama kuine zuva mangwanani uye masikati kuchipisa,” inodaro MSD.
“Kusanduka-sanduka kwekudziya kunogona kukanganisa utano hwevanhu munharaunda. Mamiriro ekunze ezuva aya akanakira michato uye mimwe mitambo yekunze.
“Asi, onai kuti vanoda kuchengetedzwa utano hwavo vawana nhumbi dzinodziya, kunyanya kumanheru.
