Kwayedza
Abel Ndooka
MITAMBO yose yeCastle Lager Premier Soccer League yambomiswa nechinangwa chekupa mukana wekuti nhandare dzinotambirwa nhabvu, idzo dzinosanganisira National Sports Stadium (NSS), dzimbovandudzwa.
Mutauriri wePremier Soccer League (PSL) — Kudzai Bare — anoti mitambo iyi ichazosimudzira nemusi wa1 Chikunguru.
Bare anoti panguva yambomiswa mitambo iyi, vanotarisira kuti dzimwe nhandare dzakaita seRufaro Stadium, Nyamhunga Stadium neSakubva Stadium dzichavandudzwa zvizere kusvika padanho rinotenderwa kuti dzitambirwe mitambo yePSL.
“Tinozivisa kuti mitambo yose yeCastle Lager Premier Soccer League yave kumbomiswa, ichazodzoka nemusi wa1 Chikunguru 2023.
“Danho iri ratorwa nechinangwa chekupa nguva kubasa riri kuitwa rekuvandudzwa kweNational Sports Stadium.
“Tinotarisira kuti basa rekuvandudza dzimwe nhandare dzakaita seRufaro, Nyamhunga neSakubva rinenge rapera apo pachazosimudzira mitambo yeCastle Lager Premier Soccer League,” anodaro Bare.
Danho iri ratorwa panguva iyo nhandare yeNSS iri kunyanya kushandiswa sezvo pasvondo yange ichitambirwa mitambo inodarika mina.
Nhandare yeRufaro Stadium muguta reHarare iri pakati pekuvandudzwa kuitira kuti isvike padanho rinotenderwa kuti itambirwe mitambo yePSL
Zvikwata zvinoti Dynamos, CAPS United, Simba Bhora, Herentals College, Yadah Stars, Black Rhinos neZPC Kariba kubvira kutanga kwemwaka uno zvose zviri kutambira nhabvu yazvo paNational Sports Stadium izvo zvakazosvitsa pakuremera nhandare iyi.
