Kwayedza
Kingstone Mapupu
MURUME wekuGokwe-Mapfungautsi anonzi akabirwa motokari yake nemakororo gumi ainge akapakata zvombo mumugwagwa weKadoma-Empress.
Mutauriri wemapurisa kudunhu reMidlands, Inspector Emmanuel Mahoko, vanotsinhira nyaya iyi vachiti murume uyu akabirwa motokari yemhando yeNissan Caravan inokosha US$5 000 nenguva dza7 husiku.
“Believe Bhobho anobva kuGokwe-Mapfungautsi aityaira motokari yake yeruvara ruchena Nissan Caravan ine nhamba dzinoti AFH 9428 ari mumugwagwa weKadoma Empress aine munhu mumwe chete wechirume akangozivikanwa nekunzi Tafadzwa,” vanodaro Insp Mahoko.
Zvinonzi vave kusvika pamugwagwa unoenda kuKasawe, varume gumi vaiva vakapakata mapfumo, mapanga uyewo nemabhemba vakavhara mugwagwa nematombo ndokumanikidza Bhobho kumira izvo akaita.
“Mumwe wevarume ava akazotanga kutyaira motokari iyi vamwe vose vapinda ndokunanga nemugwagwa unoenda kunzvimbo yemabhizimisi yeHove kuZhombe apo Bhobho naTafadzwa vaiva vagadzikwa kuzvigaro zvekumashure kwemotokari iyi,” vanodaro Insp Mahoko.
Bhobho naTafadzwa vanonzi vakazokwanisa kupunyuka ndokutiza vachisiya chikwata chevarume gumi ava vaine motokari iyi apo vakazonomhan’ara nyaya iyi kumapurisa ekuGokwe.
Mune imwewo nyaya inofambirana neiyi yakaitika nemusi wa13 Kurume nenguva dza6 zuva rodoka padzimba dzeWhawha Complex, mukomana wemakore 17 ekuberekwa akabirwa mari nemimwe midziyo nevarume vakamutakura nemotokari kubva kuGweru kuenda kuChivhu.
Insp Mahoko vanoti Brandon Matsika akakwira motokari nhema yerudzi rweHonda Fit yaiva nenhamba dzinoti AEF 4468 paGweru Show Ground achienda kuChivhu.
“Motokari iyi inonzi yaiva nevarume vana mukati. Apo vakanga vave kusvika patollgate repaMvuma, mutyairi wayo anonzi akatsaudza motokari iyi ndokunanga nemugwagwa wemusango. Vakazomisa motokari iyi musango umu ndokutanga kurova Matsika nemvuu nechamboko vakamutorera US$30 nenhare Samsung inokosha US$80. Vakazomusiya musango umu akuvara ndokuenda nemotokari yavo,” vanodaro Insp Mahoko.
Matsika anonzi akazoenda kunomhan’ara nyaya iyi kumapurisa uye kunorapwa kuchipatara cheGweru Provincial Hospital.
“Makororo aya achiri kutsvagwa, tinokumbira kuruzhinji kuti vatibatsire mukusungwa kwevarume vane chekuita nehumbavha uhwu. Tinokumbirawo kuti vanhu vabatsire mukuwanikwa kwemotokari yakabiwa zvakare iyo nekuzivawo makororo ari munyaya dzose mbiri idzi,” vanodaro Insp Mahoko.
Vanoyambira veruzhinji kuti vasiyane nekukwira motokari dzemushikashika kana dzimwe kunze kwekushandisa mabhazi anobvumidzwa kutakura vanhu.
“Mbavha dziri kutora mukana wevanhu vanokwira motokari dzose-dzose pakuvabira uye vamwe vari kuguma vapondwa nekubatwa chibharo,” vanodaro Insp Mahoko.
