Kwayedza
Abel Ndooka
MUTAMBI wemaWarriors neStade de Reims yekuFrance – Marshall Munetsi – akanwisa svondo radarika apo chikwata chake chakakunda Clermont Foot 2-0 mumutambo weFrench Ligue 1.
Munetsi ndiye akatanga kunwisa mutambo uyu watambwa maminitsi 17 apo Reims yakabva yahwina kekutanga mumwaka mutsva weLigue 1.
Mumutambo weReims wekutanga wakatambwa masvondo adarika apo yakakundwa 2-1 neOlympique Marseille uye Munetsi akabatsira mutambi wechikwata chake, Junya Ito, kunwisa vatamba maminitsi 10, asi Marseille yakazodzora ndokuhwina mutambo uyu.
Achitaura mushure mekunge mutambo wavo neClermont Foot wapera, Munetsi akanyora paSocial Media pamapeji ake eFacebook neTwitter kuti: “Kutamba kwakanaka sechikwata, Stade de Reims kuhwina mutambo wedu wekutanga tiri pamusha pedu. Tinoramba tichienda mberi. #Mwariakanaka.”
Mwaka uno, Munetsi ari kutarisira kuenda mberi nenhabvu zvichitevera kutamba kwaakaita zvinonwisa mvura mwaka wadarika apo akanwisa kanomwe mumitambo 34 yeReims yemuLigue 1.
Matambiro ake aya akazoona Reims ichirwisa chaizvo kuti imupe kondirakiti itsva iyo ichazopera mugore ra2027.
Mwaka wadarika, pamitambo yese 34, Munetsi mumwe wevatambi vaitanga kusarudzwa kupinda muchikwata cheReims naWilliam Still apo vakazopedza vakagara pechi11 muFrench Ligue 1.
Pari zvino Reims yakagara pechisere palogo iine zvibodzwa zvitatu kubva mumitambo miviri yayatamba.
Kuchiti mutambi weOlympique Lyon – Tino Kadewere – remangwana rake kuchikwata ichi harina kunyatsojeka sezvo mumitambo miviri yekutanga mwaka uno ange achingogariswa pabhenji.
