Kwayedza
Muchaneta Chimuka —
MUNYORI weKwayedza —Kingstone Mapupu — svondo rapera akatora mubairo mukuru wekugona kunyora nyaya dzetsika nechivanhu, weTraditional and Cultural Reporter of the Decade mumakwikwi akarongwa nesangano reZimbabwe National Traditional Healers’ Association (Zinatha).
Mapupu akaenda kumba nemubairo wemari nechitupa chekumupembedza.
Mutungamiriri weZinatha, VaGeorge Kandiyero, vanoti vakapa Mapupu mubairo uyu mushure mekuona kushanda kwake nesimba mukunyora nyaya dzechivanhu kwemakore akawanda.
“Tapa Mapupu mubairo uyu mushure mukunge taronda kushanda kwake nevarapi vechivanhu nevemachechi zvisina zorororo kwemakore anodarika gumi.
“Bepanhau reKwayedza ndiro bedzi ratakasarudza nekuda kwekuti haringonyori nyaya dzakadai apo neapo sezvinoita mamwe ayo anongonyora bedzi kana paine zvakashata zvinenge zvaitika kun’anga nemaporofita, asi kuti rinobata kwese – kunzungu nekunyimo.
“Svondo nesvondo rinobudisa chikamu chine chekuita netsika nemagariro zvinova zvinosimudzira chivanhu chedu,” vanodaro VaKandiyero.
Vanoti munyika muno nekunze, kune vanhu vakafunda zvikuru asi vanoramba vachikoshesa chivanhu chavo.
“Ndinopa kutenda zvikuru nebasa rinoitwa neKwayedza apo rinoyambira vanhu maringe nenyaya dzechivanhu kuitira kuti tsika dzedu nemagariro zvisayeredzwe nechiRungu. Tinoda kupedza mweya wekutarisirwa pasi kwevarapi vechivanhu nekuti ruzhinji rwenyika ino rwunoenda kunotsvaga rubatsiro kwavari,” vanodaro. Mapupu anoti anofara nemubairo waakapihwa neZinatha achitendawo vaanoshanda navo.
“Ndinofara zvikuru nekusarudzwa kwandakaitwa neveZinatha vachindipa mubairo uyu nekuti zvinotipawo shungu dzekuti tirambe tichinyora nyaya dzechivanhu. Zvinofadza zvikuru kutendwa panguva iyo unenge usingafungire kuti kune vanenge vachitorondawo mabasa ako,” anodaro Mapupu.
