Kwayedza
Ray Bande —
MAPURISA anoona nezvekudzivirirwa kwemhirizhonga akazoshevedzwa pachikoro cheNyanyadzi High School, kuChimanimani, neMuvhuro svondo rino apo vana nevabereki vaidya marasha vachida kuti mumwe mudzidzisi wechikadzi uyo ari kupomerwa kupinza varairidzi nevana muchitendero cheSatanism adzingwe basa.
Mhomho yevanhu vanodarika 1 000 – vana nevabereki – yakaungana pachikoro ichi, vachipomera murairidzi uyu kuita zveSatanism.
Kuratidzira uku kunotevera kupupura kunonzi kwakaitwa nemwana ane makore 17 okuberekwa uyo ari kuita Form 3 pachikoro ichi achiti haachadi kuramba achiuraya vanhu.
Mukuru wedzidzo kuManicaland, VaEdward Shumba, vakamhanyirawo kuchikoro ichi kunoona zvaiitika. Pakasvika vatori venhau pachikoro ichi, mhomho yaivepo yaiimba ichiti murairidzi uyu nevamwe vake – avo vaive vavharirwa mune imwe kamuri – vaburitswe.
Mukuru wechikoro cheNyanyadzi High School, uyo akangodurwa saVaChemwanyisa, akaramba kutaura nevatori venhau pamusoro penyaya iyi ndokuti vanofanira kutaura naVaShumba.
VaShumba vanotsinhira kuti vaizoenda kuchikoro ichi vachiti vanoda kuona kuti vana vatanga kudzidza zvakanaka zvakare.
“Hongu, ndazvinzwa kuti ndizvo zviri kuitika. Asi handikwanise kutaura zvakazara pamusoro penyaya iyi nekuda kwezvandanzwa izvi,” vanodaro.
Vanoenderera mberi: “Zvatiri kunyanya kuda ndezvekuti dzidzo ienderere mberi uye zvimwe zvose zviri kunetsa zvozogadziriswa.”
Kanzura weChimanimani Ward 8, Cde Muyaphi Chinguno – avo munzvimbo yavo ndimo mune chikoro ichi — vanoti nyaya iyi yakatanga apo mwana wechikoro ari kuita Form 3 uyu akapupura mabasa ake eSatanism.
“Musikana uyu akati Satanism yakurumbira pachikoro ichi. Anoti pane vana vanosvika 400 nevadzidzisi vana vakapinzwa mune zveSatanism. Akapupura zvakare kuti kune vamwe varairidzi vepachikoro chiri pedyo, cheDirikwe Primary School, vari kuitawo zveSatanism,” vanodaro.
Mwana uyu — uyo aive pamba pevabereki vake — anotsinhira kuti akapinzwa muchitendero cheSatanism.
“Hongu, ndakapinzwa muSatanism nemumwe musikana ari kuita Form 4 (zita tinaro) uyo akandipa siwiti yechocolate. Kubva pazuva iri, ndave kuita zveSatanism uye basa rangu ndere kuperekedza avo vanenge vatumwa kunouraya vanhu nekutora ropa,” anodaro.
Sadunhu Witness Gudyanga venzvimbo iyi vanoti murairidzi ari kupomerwa uyu akaramba kuuya kudare ravo svondo rapera apo vakange vamushevedza nekuda kwenyaya iyi, achiti anogona kuenda kumatare achivapomera mhosva yekusvibisa zita rake.
