Kwayedza
Munyori weKwayedza
KAMBANI huru pakuuchika nekutengesa mbeu dzemuminda nemumabindu — yeSeed Co — yakasimudzira mumwezve munhukadzi, mudhumeni Mai Wendy Madzura, kuva mukuru wechikamu chayo chevarimisi, Head of Agronomy.
Mai Madzura vatora chigaro changa chiina Dr John Basera, avo vachangobva kudomwa nemutungamiri wenyika President Mnangagwa semunyori mukuru webazi rezvekurima.
Mai Madzura vagara vachinyora muKwayedza apo vanopanga varimi nzira dzakanaka dzekurima idzo dzinopa goho guru, pundutso nekutora basa rekurima sebhizimisi.
Vanopakurazve hunyanzvi hwavo hwekurima paredhiyo nepaterevhizheni.
Vachizivisa kuvatori venhau nezvekugadzwa kwaMai Madzura pachigaro chitsva uye chepamusoro mukambani iyi nemusi weChipiri svondo rino, anoona nezvekuburitswa kwemashoko muSeed Co Group, Muzvare Marjorie Mutemererwa, vanoti iyi ibudiriro huru mukambani yavo.
“Tinotenda Seed Co regional managing director, VaDenias Zaranyika, nekuvimba nevanhukadzi mukambani ino, vari kuramba vachitisimudzira. Vachangobva kusimudzira Wendy Madzura kuti ave mukuru wechikamu chevarimisi, basa raiitwa naDr Basera.
“Tawanda vanhukadzi vane zvigaro zvepamusoro muSeed Co uye tinozvitenda zvikuru. Wendy munhukadzi anoshanda nesimba, ane ruzivo nebasa rake saka hatimutyire pachigaro chake chitsva,” vanodaro Muzvare Mutemererwa.
Mai Madzura havasi mutsva kuvarimi sezvo vachifarira kugara vari muminda nevarimi vachivapanga mazano anoita kuti vasimukire mubasa ravo.
“Ndinotenda nechivimbo cheSeed Co mandiri, uye ndinovimbisa kushanda nesimba kuti nyika yeZimbabwe ive dura guru panyaya dzekurima. Ndicharamba ndichipakurira varimi ruzivo rwunoita kuti vafambire mberi nebasa ravo,” Mai Madzura vanoudza Kwayedza.
