Kwayedza
CHIKORO cheMasawi Primary School, chiri kwaNyamweda, kuMhondoro, chinonzi svondo rapera chakambovharwa zvichitevera kuzara kwakaita zvimbudzi zvepo senzira yekuchengetedza utano hwevana nevadzidzisi kubva kuzvirwere zvakaita semanyoka echolera.
Kwayedza yakaita hurukuro nasabhuku wenzvimbo iyi, VaSlyvester Magarasadza, avo vanotsinhira dambudziko rekuzara kwezvimbuzi zvepachikoro ichi.
“Ichokwadi, chikoro ichi chakambovharwa kwemazuva matatu nekuda kwezvimbuzi zvakazara saka vana vakanzi vamboenda kudzimba panguva iyo zvaigadzirwa. Dambudziko rekuzara kwezvimbuzi iri rakatanga panguva yezororo rezvikoro asi nekuda kwekushaya zvekushandisa kuti zvigadzirwe, zvikoro zvakasvika pakuvhurwa zvimbuzi zvisati zvapera kugadzirwa,” vanodaro Sabhuku Magarasadza.
Vanoti mushure memazuva matatu vana vasingaende kuchikoro, pakazoitwa musangano wechimbi-chimbi apo mumiriri weMhondoro-Mubaira mudare reNational Assembly, Cde George Gangarahwe, vakabatsira nematsaga 40 esimende yekuvakisa zvimbuzi izvi.
“Takazoita musangano, MP wenzvimbo ino VaGangarahwe vakapa matsaga 40 esimende vabereki vakanzi vabatsirewo nezvidhina saka vana vave kudzokera kuchikoro nekuti basa rave kufambira mberi haro. Takange tave kutyira nyaya dzeutano nekuti vana vaigona kurwara nemudumbu kana kudonherwa nemidhuri,” vanodaro.
Cde Gangarahwe vanotsinhira nezvekumbovarwa kwakaitwa chikoro ichi vachiti vari kubatsira nematsaga esimendi kuti zvimbuzi zvivakwe.
“Vana vakange vave nemazuva vasingaende kuchikoro saka ini ndini ndakazoita kuti vachitangisa kudzokera nokudaro mabhiridha ari mushishi kuita basa apowo vana vachidzidza,” vanodaro.
Mukuru anoona nezvedzidzo kudunhu reMashonaland West, VaSlyvester Mashayamombe, vanoti vanoda nguva yekuongorora mamiriro akaita nyaya iyi.
“Nyaya yamuri kutaura handisati ndaiziviswa, zvinhu zvinotishamisawo kuti chikoro chingavharwe tisina kuziviswa.
‘‘Regai tiite ongorororo uye tiri kutotuma vanhu kuti vaendeko vanoona kuti chii chiri kutora nzvimbo pachikoro ichocho,” vanodaro.
