Kwayedza
KUNOTSVA demo kugosara mupinyu svondo rino neMugovera kunhandare yeRufaro Stadium apo Dynamos ichasangana neHarare City mumutambo weCastle Lager Premiership uyo unozivikanwa nekuti Harare Derby.Mutambo uyu unorakidza kuti uchanakidza kukunda ngoma kurira sezvo uchange uri wekutanga uyo uchaona murairidzi weHarare City, Moses Chunga, achisangana neDeMbare iyo yaakatambira zvakanyanya.
Pose panotaurwa nezvevatambi vakanetsa kuDynamos FC, zita raChunga – uyo anozivikanwa nemazita emadunhurirwa ekuti Razorman kana kuti Bambo – harisari.
Chunga akapihwa basa rekutungamira Harare City kuti ipedze iri pazvikwata zvitatu zvepamusoro kozoti DeMbare iri kurwira mukombe wePSL kunyangwe hazvo yakatanga ichitatarika.
Murairidzi wevabati vepagedhi kuDeMbare, Gift ‘Umbro’ Muzadzi, anoti mitambo yakadai yakaoma zvikuru nekudaro vanofanira kutorwa semvumba.
“Mutambo wedu wakaoma uyu asi tave kuita tichisimuka palog, zvave kurakidzira kuti tine kwatiri kuenda.
“Mitambo ye‘derby’ yakaoma zvikuru nekuti angobwaira chete anodyiwa.
“Isu tiri chikwata chihombe tinofanirwa kuzvirakidza, kwose kwatinotamba tisu tinenge tichiita kunge tiri pamusha kunze kwekuBabourfields chete patinotamba neHighlanders,” anodaro Muzadzi.
Zvakadaro, Chunga anoti vatambi vechikwata chake vanofanirwa kukwiridzira masokisi avo apo vari kusangana neDymanos svondo rino.
Anoti vanofanira kugadzirira mutambo uyu uye vorega kuvarairwa zvichitevera kuhwinha kwavakaita mitambo miviri yadarika apo vakakunda Ngezi Platinum Stars 2-1 neBulawayo City 2-0.
“Ndinotarisa mutambo uyu zvakangofanana nemimwe mitambo uye ndinoziva kuti panogona kuve nekurongerana kwakasimba sezvinogara zvichiitika kana ndichitamba neDynamos ndiri kune chimwe chikwata,” anodaro Chunga.
Zvakadaro, mwaka uno wePSL uri kunakidza zvikuru sezvo zvikwata zvakasiyana zviri kutamba nhabvu inonwisa mvura kozoti zvimwe zvakaita seBorder Strikers, Mutare City neTsholotsho zviri kutatarika.
CAPS United vs Bulawayo City
CAPS United yakatungamira palog svondo radarika zvichitevera kukunda kwayakaita Mutare City 2-0. Zvakadaro, svondo radarika kwakambenge kwaita nyonga-nyonga kuKepe-kepe zvichitevera kuramwa kwaiita vatambi vechikwata ichi kuita gadziriro dzavo vachichema-chema kuti vakange vasina kubhadharwa mari yavo yemwedzi wadarika.
Zvisinei, vatambi ava vakazowirirana nevakuru vechikwata ichi panyanya iyi zvakaita kuti mamiriro ezvinhu agadzikane.
Svondo rino Kepe-kepe ichange iri pamusha apo ichasangana neBulawayo City.
Bulawayo City, iyo yakapinda muPSL gore rino, iri kutamba nhabvu inonwisa mvura.
FC Platinum vs Triangle
ZPC Kariba masvondo adarika yakave iyo chikwata chekutanga kukunda FC Platinum iyo yange isati yambokundwa mumitambo inopfuura 20.
Svondo rino ZPC Kariba iri kusangana neTriangle kunhandare yeMandava Stadium, kuZvishavane.
Mitambo
CAPS United vs Bulawayo City
Chapungu United vs How Mine
Harare City vs Dynamos
Highlanders vs Kariba
Hwange vs Mutare City
Ngezi Platinum vs Border Strikers
Platinum vs Triangle United
Tsholotsho vs Chicken Inn
