Kwayedza
KUNENGE kusingadanwe anonzwa nemusi weMugovera neSvondo kuMandava Stadium kuZvishavane neBabourfields kuBulawayo uko zvikwata zvina zvinoti FC Platinum, Harare City, Ngezi Platinum neHighlanders zvinenge zvichirwira mukombe weChibuku Super Cup.
Mutambo wekutanga uchatambirwa kuMandava Stadium uyo uchaona chikwata chaMoses Chunga – Harare City FC maSunshine City Boys shasha ine mukombe weChibuku – ichisangana neFC Platinum.
FC Platinum yakambohwina mukombe uyu mugore ra2014 ichirairidzwa naNorman Mapeza.
Pose panowanzosangana zvikwata zviviri izvi pagara panotambwa nhabvu inonwisa mvura uye Harare City ine kakudherera kainoita FC Platinum sezvo masvondo adarika yakaikwapaidza 2-1 mumutambo wePremier Soccer League.
Aka kachange kari kechitatu Harare City neFC Platinum zvichisangana mumutambo weChibuku Super Cup. Pekutanga, zvakasangana mugore ra2014 mufainari yakazohwinwa neFC Platinum mushure mekunge yakunda City 3-1 kumapena apo mutambo uyu wakange wapera uri mangange 1-1.
Mutambo uyu wakazonetsa sezvo City yakadzokera ichichema ichiti yakange yabirirwa.
Mugore ra2015, zvakasangana zvakare muquarter-final, FC Platinum ndokuumburudzwa izvo zvakazoona City ichifambira mberi mumutambo uyu kusvika yahwina mukombe.
Svondo rino maziso ose achange akatarira kuda kuona kuti ndechipi chikwata chichapinda mufainari pakati pezviviri izvi.
Nekune rimwe divi, FC Platinum iri kurwira mikombe miviri – wePSL neweChibuku.
Ngezi Platinum vs Highlanders
Vatsigiri venhabvu vazhinji vaifungidzira kuti zvimwe Ngezi Platinum ichatatarika mwaka uno uyo unove wekutanga iri muPremier League asi matambiro ayo ashamisa vakawanda sezvo iri kutorawo mukombe weChibuku.
Kuuya kwaTonderai Ndiraya kwakashandura zvakawanda muchikwata ichi uye chimwe chezviri kutamba nhabvu inonwisa mvura mwaka uno.
Svondo rino iri Ngezi Platinum Stars iri kunanga kuBabourfields uko ichasangana nechikwata chaElroy Akbay – Bosso – iyo iri kurwira mikombe miviri mwaka uno weChibuku newePSL.
Bosso haisati yambohwina mukombe weChibuku.
