Kwayedza
. . . Chidzambwa otaura pamusoro peCaps, Ngezi Platinum
Abel Ndooka
SHASHA yakambonetsa ichitamba nhabvu ndokuzoita mukurumbira ichirairidza mutambo uyu – Sunday ‘Mhofu’ Chidzambwa – anoti CAPS UNITED neNgezi Platinum Stars zvinofanirwa kurwa semvumba kana zvichada kufambira mberi mumitambo yazvo yeCAF Champions League neConfederations Cup.
CAPS UNITED iri kurwira kuenda kumagroup stages emitambo yeCAF Champions League apo ichasangana neTP Mazembe nemusi weSvondo kuDemocratic Republic of Congo (DRC).
Nerimwewo divi, Ngezi Platinum Stars ichatamba neRecreativo do Libolo FC yekuAngola mumutambo weConfederations Cup nemusi weMugovera.
Munhoroondo yenhabvu yemuZimbabwe, Dynamos FC ndiyo yega yakakwanisa kusvika kufainari yemutambo uyu apo yakazokundwa neAsec Mimosa yekuCote d’Ivoire uye panguva iyi yairairidzwa naChidzambwa.
Chikwata chaChidzambwa pachakasvika kufainari chaive nevatambi vakaita saMemory Mucherahohwa, Makwinji Soma-Phiri, Lloyd Mutasa, Enerst Chirambadare, Gift Muzadzi, Kalisto Pasuwa, Desmond Maringwa naHarlington Shereni.
Zvakadai, Chidzambwa anoti ari kutemba CAPS UNITED neNgezi Platinum Stars kuti zvinosvika kumagroup stages emitambo yazvo nekuti zvikwata zvakasimba chaizvo.
Anoti chinongodiwa nezvikwata zviviri izvi kunwisa apo pazviri kuenda kunokwikwidza kuDRC neAngola kuitira kuti zvizopedzisa basa pazvinozouya muno svondo rinotevera.
“Vanofanirwa kunorwira kuti vanwise pavari kuenda kunze uko kuitira kuti pavanozouya muno vazongopedzisa basa.
“Ndichitarisa zvikwata zviviri izvi – Ngezi neCAPS – zvese zvine vatambi vepamusoro vanogona saka hapana chandinoona chinovatadzisa kuhwina mitambo miviri iyi yavatarisana nayo iyo ichavazivisa kuti vanopinda mumagroup stages here kana kuti kwete,” anodaro Chidzambwa.
Anoti murairidzi weCAPS UNITED – Lloyd Chitembwe naTonderayi Ndiraya weFC Platinum vanohwinha mumitambo iyi kana vatambi vavo vakatamba zvakasimba.
Zvakadai, David ‘Yogi’ Mandigora panguva yaakamborairidza Dynamos mugore ra2008 akasvikawo kusemi-fainari yemutambo uyu akazoburitswa neCoton Sport yekuCameroon.
“Hatingazive kuti ramangwana redu rakamira sei, zvinozivikanwa naMwari chete.
“Asi, ini pandakasvika kufainari neDynamos chikwata changu chairwa zvakasimba tiri pamusha uye tiri kunze uko.
“Ndizvo zvinongodiwa chete kurwa kuti zvikwata izvi zvikunde,” anodaro Chidzambwa.
