Kwayedza
Kingstone Mapupu —
MUDZIMAI wechidiki wekuMasvingo anoti ari kuoneswa pfumvu nezvipoko zvevarume vapfumbamwe avo vaakadanana navo pamakore akasiyana asi vose vakazofa vachirutsa ropa nekuchaya manyoka ane ropa nekuda kwerunyoka kana kuti rukawo urwo rwaakaiswa neaimbove murume wake.
Felistaus Jenje (26) anoti varume vapfumbamwe ava vose vakafa mushure memazuva matatu ashinha navo.
Anoti pane murume waakambodanana naye pakutanga, uyo waane vana vaviri naye, akamushandisira runyoka rwemhando yebanga apo akamumanikidza kuvhara banga reOkapi raive rakavhurika mushure mekunge amupomera kuita zvechipfambi.
Mukadzi uyu anoti ane fungidziro huru yekuti banga iri raive rakapingwa nemushonga uye kurivhara kwaakaita yaitove mhiko yerunyoka paari.
“Ndakaroorwa mugore ra2008 uye ndine vana vaviri neaimbove murume wangu uyu. Murume uyu aindifungira kuti ndaiita gumbo mumba, gumbo kunze saka akazondishandisira rukawo rwebanga reOkapi apo akandimanikidza kurivhara achindirova ndikaita sezvaaida,” anodaro.
Anoti mushure memwedzi mitatu amanikidzwa kuvhara banga iri, murume wake akazotora vana vose achibva atiza navo kuenda kuSouth Africa.
“Tava nemakore matatu tasiyana nemurume wangu. Ndakazodanana nevamwe varume pandakasiyana naye asi vakatofa kare, vanosvika 9. Varume ava ndaingoti ndikashereketa navo mushure memazuva matatu vanotanga kurwara vachirutsa ropa nekuita manyoka ane ropa, vobva vafa.
“Vamwe vacho vane mhuri dzavo dzavakasiya. Dambudziko rangu nderekuti varume ava vanouya kuhope vachindibvunza kuti ndakavauraira chii,” anodaro Jenje.
Kuti awane hope, Jenje anonwa doro mazuva ose kuitira kuti asaone zvipoko zvevanhu vaakauraisa avo vanomuvinga akarara.
“Zvinondirwadza kuti ndiri kupedza vana vevanhu vasina mhosva nekuda kwemurume akandiisa rukawo asi iye asisandide. Kundiitira hutsinye hwakadaro? Ndinodawo wekudanana naye kana kuroorwa nekuti ndichiri mudiki,” anodaro.
Jenje anoti afamba kwakawanda – kun’anga nekumaporofita munyika muno nekuMozambique — achitsvaga rubatsiro asi zviri kuramba.
Kumwe kwaanofamba achida kubatsirwa, vamwe vacho vanoguma vave kumuda vachiti vanoda kuzvionera kuti dambudziko rake iri richiripo here.
“Ndakatemerwa nyora nekunwiswa mishonga inovava. Imwe n’anga yaindibatsira yakafawo nerukawo urwu. Yaiva n’anga yekuMozambique iyo yaiva nemadzimai mashanu uye yakashinha neni ikatangawo kurutsa ropa nekuita manyoka aiva neropa. Ndinoda kubatsirwa kuti rukawo urwu rwubve,” anodaro Jenje.
Mukadzi uyu anoti kubvira pakaenda vana vake neaimbove murume wake, haana kuzombovaona.
Jenje anoti murume uyu akatombomutumira mashoko panhare yake achimuudza kuti akaroora uye achimubvunza kuti akazoroorwawo here.
Anotizve izvozvi ane murume waari kudanana naye uye vasvitsa mwedzi mitatu vasati vasangana nekutya runyoka urwu.
“Murume uyu, sevamwe vose, anondiitira zvandinoda asi ndinotya kusangana naye nekuti anofa sezvakaita vamwe.”
Jenje anoti vabereki vake vose vakafa uye anogara natete vake avo vanotiwo vari kuedza nepavanogona kuti muzukuru wavo abatsirwe.
Hama dzeaimbova murume wake, anodaro Jenje, hadzina basa naye sezvo dzichimupomera kuita chipfambi.
Vanoda kubatsira Jenje vanomubata panhamba dzinoti 0779 358 899.
