Kwayedza
Kingstone Mapupu
MUDZIMAI aigara panzvimbo yemabhizimisi yeDotito, kuMt Darwin, anonzi akafa mushure mekubatwa nemagetsi apo aibika mumba make.
Assistant Inspector Naison Dhliwayo, avo vakafanobata chigaro chemutauriri wemapurisa kudunhu reMashonaland Central, vanotsinhira tsaona iyi.
“Nemusi wa12 Ndira gore rino nenguva dzemasikati, paMupfeki Complex panzvimbo yemabhizimisi yekwaDotito, kuMt Darwin, pane mudzimai ainzi Firizai Kandaremo (23) uyo aibika nemagetsi achishandisa two-plate stove ari mumba make apo murume wake, Scott Musunda (29), ainge arere mumba imwe chete iyi,” vanodaro Asst Insp Dhliwayo.
Vanoti panguva iyi, Musunda akazomutswa neruzha rwekuchema kwemudzimai wake ndokumuona apunzikira pasi akabata tambo yemagetsi ichibva kumadziro.
“Musunda akazomhanya kunozivisa mapurisa eZRP Dotito achisiya mudzimai wake mumba umu ndokuzodzoka vose nemapurisa vachizotakura Kandaremo kuenda naya kukiriniki yepaDotito apo akafa vachiri munzira. Mutumbi wemudzimai uyu wakazoendeswa kuchipatara cheMt Darwin kuti unoongororwa,” vanodaro Asst Insp Dhliwayo.
Vanoti nyaya iyi iri kufambira mberi nekuferefetwa.
Asst Insp Dhliwayo vanoyambira veruzhinji kuti vagare vachiona kuti magetsi avanoshandisa mudzimba nekune dzimwe nzvimbo haana njodzi.
“Ikurudziro yedu semapurisa kuti vanhu mudzimba vaone kuti magetsi avo haana here zviri kunetsa vorega kusiya tambo dziri pachena. Zvimwe zvitofu zvinoshandisa mweya wegas saka zvinofanirwa kuonekwa kuti zvakavharwa zvakanaka here kuitira kudzivirira tsaona dzakadai,” vanodaro.
