Kwayedza
Kingstone Mapupu
MURUME wekuChipinge anonzi akarohwa kuTriangle, kuChiredzi, zvekuitwa kafiramberi apo akanetsana nechimwe chikwata chevarume vachirwira doro.
Mutauriri wemapurisa kudunhu reMasvingo, Inspector Kudakwashe Dhewa, vanoti nyaya iyi yakaitika nemusi wa1 Kukadzi nenguva dzemangwanani kuTriangle.
Vanoti Tichaona Muyambo (35) aibva kwaSabhuku Manzvire kudunhu raMambo Musikavanhu, kuChipinge, ndiye akafa mubongozozo iri.
Vasungwa vari kupomerwa mhosva yekuponda murume uyu ndiLovemore Mandudye (42) wekwaSabhuku Svosve kwaMambo Nhema, kuZaka naOzious Ranganai (20) wekuVillage 6 kuChitupa Pension Area, kuTriangle.
“Nemusi wa1 Kukadzi nenguva dza11 mangwanani, Tichaona Muyambo nedzimwe shamwari dzake vakasangana naObvious Ranganai naCuthbert Chirundo (24) pachitoro cheGain Supermarket vachitengesa hove, uyu Lovemore Mandudye aiva nedoro remhando yeMainstay. Tichaona Muyambo akazokumbira Lovemore Mandudye kuti vachinjanise doro iri nehove dzavaitengesa izvo akaramba,” vanodaro Insp Dhewa.
Pasina kuwirirana, zvinonzi Muyambo akazotora nechisimba bhodhoro redoro kubva kuna Mandudye ndokutanga kurinwa.
“Lovemore Mandudye anonzi akagumbuka nekutorerwa doro rake akazotangawo kutaurira shamwari yake yakasvikawo panzvimbo iyi, Sepa Mhepo (38), anobvawo munzvimbo imwe chete iyi. Nyaya iyi yakasimudzirwa kuti sei akanga anwa doro iri asina kubvumidzwa zvikazoita kuti Tichaona Muyambo, Ozious Ranganai naCuthbert Chirundo vabve vachienda kuimwe komboni yemunzvimbo iyi nechikonzero chekunetsana,” vanodaro Insp Dhewa.
Chikwata chevarume ava chinonzi chakazosangana zvakare, Muyambo ndokutanga kubvunzwa kuti sei aiva atora doro nechisimba achinwa asina kupihwa pakabva patanga kurwisanwa.
“Ozious Ranganai naSepa Mhepo vakatanga kunetsana naTichaona Muyambo uyo aiva adhakwa. Panguva iyi, Lovemore Mandudye anonzi akazotora danda ndokurova Tichaona Muyambo naro mumusoro achiti aida doro rake, akawira pasi vachibva vakwanisa kumutorera bhodhoro redoro raaiva naro,” vanodaro Insp Dhewa.
Zvinonzi Muyambo akaburitsa banga achida kuedza kuzvidzivirira kubva kune vanhu vaimurova ava iro akabverenyura vamwe naro.
Mandudye, Ranganai nevamwe vanonzi vakazotanga kurova Muyambo nezvibhakera nebhutsu kusvikira afenda uye akazoendeswa kuchipatara cheChiredzi uko akashaika achangosvika.
Nyaya iyi inonzi yakazomhan’arwa kumapurisa eZRP Chiredzi, Mandudye naRanganai ndokusungwa.
Vasungwa vaviri ava vakamirira kupinda mudare redzimhosva nenyaya yavari kupomerwa iyi apo vakachengetedzwa nemapurisa.
