Kwayedza
Kingstone Mapupu
MURUME aibva kudoro kwaMambo Chivero, kuMhondoro, anonzi akafa rufu rwunorwadza zvichitevera kuputirwa kwaakaitwa nerimi remoto wesango achibva angofira panzvimbo.
Mutauriri wemapurisa kudunhu reMashonaland West, Inspector Magarate Chitove, vanoti tsaona iyi yakaitika nemusi wa1 Nyamavhuvhu zuva rodoka apo Victor Chiveto (51) wemubhuku raChakuchichi, akapiswa nemoto wesangano ndokufa.
“Tsaona dzemoto wesango dziri kuwanda mudunhu redu reMashonaland West. Tine murume akafa nekupiswa nemoto wesora kwaChingwere, kuMhondoro anonzi Victor Chiveto (51). Izvi zvakaitika apo aibva kunonwa doro pataundishipi yeChingwere.
“Murume uyu anonzi aiva achinwa doro naTitus Muchemwa (49) anobva mumusha mumwe chete uyu,” vanodaro Insp Chitove.
Vanoti Chiveto akanga adhakwa ndokusiya vamwe vake vachinwa doro pataundishipi iyi ave kudzokera kumba oga.
“Mushure menguva inoita maminetsi gumi nemashanu, Titus Muchemwa nevamwe vaiva panzvimbo yemabhizimisi yeChingwere vanonzi vakaona moto waibvira nedivi raiva raenda naVictor Chiveto asi hapana munhu akamboita basa nazvo sezvo vaingofunga kuti murume uyu akatenge asvika kumba kwake,” vanodaro Insp Chitove.
Muchemwa anonzi akazobvawo panzvimbo yemabhizimisi iyi ari oga ave kudzokera kumba achishandisa mugwagwa mumwe chete apo akazoona mutumbi waChiveto wakatsva uri pedyo nemugwagwa.
“Chinhambwe chemamita 400 kubva panzvimbo yemabhizimisi iyi, Muchemwa akaona mutumbi waVictor Chiveto chinhambwe chemamita gumi kubva mumugwagwa waaishandisa. Murume uyu akazodzokera kunzvimbo yemabhizimisi yeChingwere kunozivisa vamwe vanosanganisira Paddington Mupfumira (54) anobva mumusha mumwe chete naye,” vanodaro Insp Chitove.
Nyaya iyi yakazomhan’arwa kumapurisa emunzvimbo iyi zvikaita kuti matikitivha ekuNorton vatange kuiferefeta.
“Mutumbi uyu wakazoendeswa kuchipatara cheNorton kunoongororwa,” vanodaro Insp Chitove.
Vanoyambira veruzhinji kuti vasapote vachipisa masango sezvo iri mhosva inosungisa.
“Tine vanhu vanotanga moto wesango nekukanda zvigusvani zvefodya mumigwagwa koitawo vamwe vanochera mbeva nevamwe vanokuhwidza moto musango vosiya wakadaro. Ngatidzivirirei moto wesango, chionai tarasikirwa neupenyu hwemunhu,” vanodaro Insp Chitove.
