Kwayedza
Gibson Mhaka
MURUME ane makore 24 ekuberekwa wekuMagulanjengwa, kuTsholotsho, kudunhu reMatabeleland North akazodzidza nenzira inorwadza kuti hadzisi chembere dzose dziri nyore kumanikidza bonde apo mbuya ine makore 69 yakamubanya sikarudzi, ndokuisvinyanga nesimba apo aida kuibata chibharo.
Clive Nkomo akapihwa chidzidzo chaasingafe akakanganwa apo chembere iyi yakaramba yakamubata sikarudzi yake nechisimba ndokumasvinyanga kudzimara agura.
Zvinonzi musi wa8 Chivabvu gore rino nenguva dza8 manheru, Nkomo akapinda muimba yekurara yechembere iyi ndokuiudza kuti aida kuita bonde nayo. Chembere iyi yakaramba zvikazoita kuti Nkomo aedze kuibhinya nechisimba.
Vaviri ava vanonzi vakarwisana uye pakurwisana ipapa, chembere iyi nehushingi yakabva yabata sikarudzi yaNkomo, ndokuisvinyanga zvakasimba zvikazoita kuti murume uyu abongomore kucheme achidaidzira kuti abatsirwe.
Nekutyira kuti murume uyu aizofira mumaoko mayo, chembere iyi yakabva yamuregedza.
Mushure mekunge ambozorora zvishoma, Nkomo – uyo anonzi aiva nechidokwa-dokwa chakanyanya chekuda kubhinya – akabva arova chembere iya nechidhinha mumusoro ndokutora redhiyo iyo akatiza nayo.
Nkomo, uyo akanga achishaikwa kubva musi uyu, akazosungwa musi wa13 Gunyana 2021.
Akamiswa pamberi pemutongi mukuru wedare rekuTsholotsho Magistrate Court, VaVictor Mpofu, nemhosva yekuedza kubata chibharo pasi pemutemo weSection 189 neSection 65 Criminal Law (Codification and Reform) Act Chapter 9:23.
Nyaya iyi chiri kuenderera mberi mudare iri uye Nkomo ari kutongwa ari muchizarira.
