Kwayedza
Daphne Machiri —
MAMBO Negomo, Lucious Chitsinde (42), vekuChiweshe kudunhu reMashonaland Central vanoti zvakakosha kuti veruzhinji varemekedze madzimambo sezvo vari ivo vanochengetedza tsika nemagariro evanhu.
Vanotaura mashoko aya zvichitevera nyaya yavakatonga mudare ravo mazuva mashoma adarika, yemukomana akabatwa nedare iri nemhosva yekutema Mambo Makope, VaJacob Mapirinjanja, vekuMvurwi nedemo mushure mekunge vamutsiura apo aitema muti werudzi rweMusasa uyo unonzi unoera mudunhu ravo uyo wange wava nemakore angangosvika 100.
Vanoti vakapa chirango chekuti mukomana uyu, Belington Nyamadzawo (24), uyo anogara kunzvimbo yeMurongore, kuMvurwi, abvise mombe shanu nekuda kwekuzvidza kwaakaita Mambo Makope nekuvatema nedemo.
“Mukutsanangura kwavakaita Mambo Makope vachipotera kudare rangu mushure mekunge vatemwa nemukomana wechidiki, Belington Nyamadzawo, uyo anogara kunzvimbo yeMurongore, muMvurwi, ndakaona kuzvidzwa kukuru kwedare, kudzikisirwa pasi zvakanyanya inova nyaya hombe,” vanodaro Mambo Negomo.
Vanoenderera mberi vachiti: “Ndakatonga nyaya iyi ndichitarisa pasichigare chedu, hukoshweswa hwemunhu anonzi mambo. Izvi zvakabva kuna Mwari, kana mubhaibheri chaimo maiva nemadzimambo vanaMambo David nevamwe.
“Belington ndakamutemera chirango chekuripa mombe shanu idzo dzaachaendesa kwaMambo Makope.”
Nyamadzawo akatongwa asipo sezvo asina kuenda kudare iri uye Mambo Negomo vanoti kusaenda kudare kwaakaita pamwe nevamwe vemumhuri yake mushure mekunge apihwa masamanisi chiratidzo chekuzvidza dare ravo zvakare.
Vanotizve mutongo wavakapa uyu uchave chidzidzo kune vamwe veruzhinji chekuti madzimambo nemadzishe vanofanirwa kuremekedzwa.
“Mambo anofanira kupihwa chiremerera. Semukomana uyu, akaratidza kushora nekudzikisira mambo nedare ravo pamwe nemadzimamabo ese emunyika kusvika pakuvadzika demo odeura ropa. Kwatiri kana totarisa pachivanhu chedu, kutadza kukuru kunoda mutongo wakasimba,” vanodaro Mambo Negomo.
Vanoti matare emadzimambo aripo pakudzoreredza hunhu hwakanaka munharaunda.
“Matare edu haapo pakuitira vanhu hutsinye kuti vanhu vavengane, kwete. Asi kuti tiripo pakuumbiridza tsika nemagariro edu akanaka,” vanodaro Mambo Negomo. Zvakadai, Nyamadzawo – uyo akasungwa nemapurisa nguva yadarika nekuda kwekutema kwaakaita Mambo Makope – ari kutarisirwa kupinda mudare redzimhosva reBindura Magistrates’ Court achitarisana nemhosva yaari kupomerwa iyi.
