Kwayedza
Daphne Machiri
Murume wemakore 73 okuberekwa uyo aigara kuMushumbi Pools, kuGuruve, anonzi akayeredzwa nerwizi rweko achiedza kuy- ambuka apo aibva kudoro.
Mutauriri wemapurisa kudunhu reMashonaland Central, Inspector Milton Mundembe, vanoti David Matafarika Pembere – uyo aigara mubhuku raMadzomba A, kwaMambo Chisunga – anonzi akabva pamba pake musi wa11 Kukadzi zuva rave kunovira achiti aienda kunonwa doro.
“Izvi zvakabuda mukuferefetwa kwakaitwa nemapurisa apo akataura nem- wana waMatafarika ane makore 35 uyo anoti baba vake vakange vaenda kunonwa doro kuMushumbi Business Centre asi ndokutadza kudzoka kumba,”vanodaro Insp Mundembe. Vanoti zvakazobuda kuti Matafarika akange ayeredzwa nerwizi rwaManyame.
“Mutumbi waMatafarika wakazoonekwa uri murwizi rwaManyame,”vanodaro.
Insp Mundembe vanoyambira veruzhinji kuti vasiyane netsika yekuyambuka nzizi dzinenge dzakazara.
“Chimwe chatinokurudzira ndechekuti veruzhinji varege kushandisa nzira dzekudimburira, kunyanya dzinenge dzichipinda nemurwizi, shandisai nzira dzakarurama zvinova zvinoita kuti tirege kusangana nenjodzi dzakaita sekurasikirwa neupenyu,”vanodaro.
