Kwayedza
Abel Ndooka
ZIMBABWE Cricket yakadoma chikwata chemaChevrons icho chichakwikwidza mumutambo weICC Men’s Cricket World Cup Qualifier kutanga mwedzi uno.
MaChevrons achapinda muhondo apo achabandana nezvimwe zvikwata zvipfumbamwe achirwira zvibodzwa zviviri zvasara zvekuenda kumutambo weICC Men’s Cricket World Cup uyo uchatambirwa kuIndia gore rino.
Mitambo yemaqualifier ichatanga nemusi wa18 Chikumi ichizopera nemusi wa9 Chikunguru uye ichange ichitambirwa kunhandare ina dziri muHarare neBulawayo dzinosanganisira Harare Sports Club neQueens Sports Club.
Mutauriri weZC – Darlington Majonga – anoti vatambi vemaChevrons vane mukurumbira vanosanganisira kaputeni wechikwata Craig Ervine, Sikandar Raza, Sean Williams naTendai Chatara vese vakashevedzwa kuzopinda muchikwata chaDave Houghton icho chicharwira kuenda kuWorld Cup.
“Apo tiri kuzama kuhwina chimwe chezvinzvimbo zviviri zvasara kumutambo weICC Men’s Cricket World Cup 2023 iyo ichatambirwa kuIndia gore rino, Zimbabwe yakashevedza simbi dzayo dzebasa dzinoti Craig Ervine, Sikandar Raza, Sean Williams naTendai Chatara kuzotamba mumutambo uyu uchange une zvikwata 10.
“Tichange tichitarisira zvekare kuvatambi vakaita saBlessing Muzarabani naRichard Ngarava, kuchiti Ryan Burl naWessly Madhevere vachisimbisa chikwata ichi,” anodaro Majonga.
MaChevrons ari muboka rekutanga kumutambo uyu umo achatamba nezvikwata zvinoti West Indies, Netherlands, Nepal uye neUnited States of America.
Mumutambo wekutanga, maChevrons achasangana neNepal nemusi wa18 Chikumi kuHarare Sports Club uye ozotamba neNetherlands nemusi wa20 Chikumi.
Nemusi wa24 Chikumi, chikwata chenyika ichi chichatatsurana neWest Indies mumutambo uyo unotariswa kunge uri mukuru wemuboka iri reGroup A, ozotamba mutambo wekupedzisira nemusi wa26 apo achabandana neUSA.
Kune rimwe boka, kuchange kune zvikwata zvinoti Sri Lanka, Ireland, Scotland neOman.
Pachatambwa mitambo iyi, zvikwata zvichapedza zviri zvitatu muboka rega zvichafambira mberi kuenda kuSuper Six uko zvichazotamba pozoonekwa zviviri zvinenge zvapedza zviri pamusoro pezvimwe izvo zvinobva zvahwina matikiti maviri ekuenda kuWorld Cup.
Chikwata cheZimbabwe: Burl Ryan, Chatara Tendai, Ervine Craig, Evans Bradley, Gumbie Joylord, Jongwe Luke, Kaia Innocent, Madande Clive, Madhevere Wessly, Marumani Tadiwanashe, Masakadza Wellington, Muzarabani Blessing, Ngarava Richard, Sikandar Raza naWilliams Sean
