Kwayedza
Kingstone Mapupu
KUBVIRA pasichigare, kune nzira dzekurera mhuri idzo dzaishandiswa nevakuru – dzimwe dzacho dzemishonga yechivanhu izvo zvasiyana nemakore ano apo pave kushandiswa mapiritsi nezvimwe.
Nzira dzekuronga mhuri dzakare idzi dzainge dzakanakirei uye dzainyatsoshanda here? Ko dzasiyanei nenzira dzave kusevenzeswa mazuva ano?
Kwayedza inoita ongororo pamusoro penyaya iyi ndokuita hurukuro nenyanzvi dzezvechivanhu nevamwe vanhu vechikuru ndokunzwa mavhu nemarara.
Mbuya Sadzi Chari Razawo (80) vanogara mumusha weMbare, muHarare, vanoti kune nzira dzechivanhu idzo vaishandisa kare kusati kwava nemapiritsi nemimwe mishonga yekuronga mhuri.
“Varume vedu kare ndivo vaiziva kurera mhuri kwazvo, vaiita kunonzi kudhonza kureva kuti vaisasiya mbeu muna amai pakuita bonde vachiziva kuti vaida kuti mwana akure. Vamwe vairara kwavo, madzimai kwavo kudzimara mwana akura,” vanodaro Mbuya Razawo.
Vanoti kune mishonga yaiiswa mumachira matsvuku kana machena ayo aizosungwa muchiuno nemadzimai kuti vasabate pamuviri.
“Nzira idzodzi dzaishanda kana kupotsa uyewo varume vaigona kubuda mudzimba dzinorara madzimai avo vazvere kusvikira makore maviri vozodzoka pabonde. Kune vamwewo vaisvetuka makwenzi madiki vosungirwa mikosi yairukwa nerwodzi rwaisvuurwa pamakwenzi aya, zvikuru emisasa.
“Mudzimai aigona kugara makore asina kubata pamuviri uye aizodzoka ocharika zvakare gwenzi riya kana ave kuda kuita pamuviri,” vanodaro Mbuya Razawo.
Mbuya Razawo
Vanoti chimwe chainetsa panguva yavakakura zvirwere zvepabonde senjovhera izvo zvaikonzera kuti mamwe madzimai kana varume vatadze kuita mbereko.
“Muno muMbare, paNazareta apa paiva nechikamu chairapwa siki bedzi pawainovharirwa sezvaiitwa vane maperembudzi uchirapwa kusvikira maronda enjovhera apera – ingava songoya kana imwe yekujuja ropa. Kune yainzi chindoko yaikonzera kuti munhu ayerere vhudzi naiyo drop nemamota.
“Zvino patsika yekuronga mhuri yavako mazuva ano, zvinopa madzimai zvirwere muzvibereko voguma vave kutadza kuita vana,” vanodaro Mbuya Razawo.
Sekuru Friday Chisanyu – avo vanova mukuru wesangano rinomirira vanachiremba vechivanhu reZimbabwe National Practitioners Assocication – vanoti mishonga yechivanhu yekurera mhuri ichiri kushandiswa.
“Pane tambo dzinosungirirwa madzimai muchiuno dziine mapfundo anomirira makore avanoda kugara vasina kubata pamuviri apo bvundo rinomirira gore rimwe chete. Kureva kuti shinda iyi ikaiswa mapfundo mashanu, mudzimai uyu anogara makore mashanu asina pamuviri, asi achisangana nemurume,” vanodaro Sekuru Chisanyu.
Kwayedza inoita hurukuro nevanhu pamusoro penyaya yekuti zvinoita here kuti varume vatengere madzimai avo mapiritsi ekurera mhuri ave kushandiswa mazuva ano.
Victor Chari (37) wekwaMurehwa anoti haakwanise kutenga mapiritsi ekudzivirira pamuviri emudzimai wake.
“Handitengere mudzimai mapiritsi efamily planning, ini kuita izvi hazvina kusiyana nekudyiswa. Mudzimai ndiye anoziva kuti mapiritsi ake apera kana imo mandinoatenga vanonditi handina kukwana,” anodaro Chari.
Victor Chari
Anotiwo haakwanise zvakare kutenga makondomu, oenda nawo kumba kunoshandisa nemudzimai senzira yekudzivirira pamuviri asi kunoashandisira kunze.
VaTito Shumba Mandaza (40) vekuGlen View, muHarare vanotiwo hazvina hunhu kuti vaonekwe vachitenga mapiritsi emudzimai wavo ekuronga mhuri.
“Mukadzi ngaatenge oga mapiritsi nekuti ndiye anoanwa, kwete ini. Panyaya yemakondomu, haaende kumba uye kana ndikatoaona mumba mangu kunofiwa. Ini ndinotenga angu ezvigororo musango, kwete kuenda nawo kumba. Zvemakondomu ekumagemhu ndinotenga ndichitoshevedzera kuti ndipei makondomu ayo, kwete kunzwika ndichiti ndipei mapiritsi ekurera mhuri. Zvakaoma,” vanodaro.
Tito Mandaza
Cynthia Makaripe (23) wekuGlen View, muHarare zvekare, anoti hapana chinonyadzisa pakuti murume atengere mudzimai wake mapiritsi ekuronga mhuri kana makondomu.
“Pane asingazive here kuti kondomu rinoshandiswe chii kana kuti mapiritsi ekudzivirira kubata mimba anoshandei? Ini ndinogona kunotenga zvose uye kana ivo baba vanokwanisa kunotenga,” anodaro Makaripe.
