Kwayedza
ZVIKORO, kubvira kupuraimari kusvika kuyunivhesiti, zviri kukurudzirwa kuti zvifambirane nenguva kuburikidza nekuti vadzidzi vashandise ruzivo rwechimanje-manje.
Kurudziro iyi yakaitwa naVaCleopas Kundiona, avo vanove mukuru pamwe nemuridzi weUMMA Institute, muhurukuro yavakaita neKwayedza svondo rapera kuMarondera.
“Zvikoro zvose zvinofanira kufambirana neruzivo rwechimanje-manje nekuti E-Learning yakakosha kuvadzidzi pamwe nevadzidzisi. Ticharamba takabatana neHururmende mukusimudzira dzidzo munyika,” vakadaro.
“Muzvikoro zvose tasvika padanho rekuti vana vashandise makombiyuta muzvidzidzo zvavo kubva kuECD. Izvi zvakakosha nekuti zvinoita kuti vana varodzeke pamwe nekuvhurika njere,” vakadaro Dr Kundiona.
Vanoti zvakakoshawo kuti vana vechikoro vadzidziswe mabasa emawoko.
“Kusimudzira dzidzo yemunyika kunoita kuti tirambe tiri pachidanho chepamusoro muAfrica munyaya dzefundo,” vakadaro.
Vanokurudzira mapoka akasiyana pamwe nemakambani akazvimirira kuti abatsirewo mukusimudzira dzidzo munyika.
“Vemasangano pamwe nemakambani akazvimirira tinovakurudzira kuti vabatsirane neHurumende mukusimudzira fundo munyika.
“Tinopa kutenda kukuru kuUnicef iyo iri kubatsira chaizvo mukusimudzira zvidzidzo zvemakombiyuta nezvesainzi munyika,” vakadaro Dr Kundiona.
