Kwayedza
NDAUWE ndauwe akhiti woye! Tinobvunze thongo redu rekupona. Takumanahe pachirongwa petinosekenyedze mutauro wedu wechiNdau.
Nyamashi uno tinode kureketa ngegama rinoti kushumbwa. Kushumbwa igama rinobhuye kuuraye muntu kubudikidza ngekubhinya. Kazhinji kacho tinozwa anhu eireketa eiti mabhinya mabhinya mazuwa ano anhunai woye, musasvipirwa kana kuhamba usiku wega. Anhu anotophanda eireketa nenharaunda yacho iri kuirikira panguweyo. Ana sabhuku anotodaidzire zviziiso zvemabhinyezvo pamishongano kana kuti pambungano dzemapfumvu paya.
Ukazwa anhu aakuti uri binya kana kuti ngana nangana uya ibhinya, chashata. Auchina muemo wakanyase kuti hwe pamberi peanhu. Peunohamba peshe anhu anonga eikukhomba ngezvawo zvikunwe. Kushumba kunouya ngenjira dzakasiyana siyana.
Kushumbwa kukurutu kwetinoziya ngekweanhu anode kuite mutombo wemabhizimisi. Anhu aya akashata maningi ngekuti anode kutsvake pfuma eishandise ngazi yeunhani wake pheya. Anozwi anonga eide mitezo yaanhu kuti bhizimisi rawo riite mare. Anotsvake anhu awo aanotumire kooite mushando uyu usikadakadzi.
Anonga akatobhuirana kuti unouya nemuntu wakadai, mukadzi ere kana kuti muisa, ndumure ere kana kuti wabve zera. Vanobhuiranahe kuti kana wamuuraya unouya nechakati chikati. Ndichakarakadza ndakati ndiri mumovha ngerimweni zuwa ari machibesu emene, takakumana nechimwe chitunha chakatsvetwe pakati pepato pemene. Takandoti tsvikii khakharara kudai.
Munhu uyu waiya akaedzengwe musoro, apa panofungidzirwe kuti wakanga aduswe uqopo. Anditi pfungwa ndidzo dzinoshande kufunga, ukazwi hauna qondo, anobuye kuti aufungi wena. Saka apa unonga eiti hambai nepfungwa dzakodzo woofunge mare uri mubhizinisi rangu.
Kazhinji anhu ane mukhuba wekuuraye umweni anonga eide kubeke mitezo iyi mumabhizimisi awo akadai ngechitoro, siraha, chigayo nemunotengeswe madoro. Asi isisu tinoti munhu haazwaro.
Kupetere ndaa yedu yenyamashi, mgatirekete ngezviro zvinonyanye kudiwa ngemabhinya kana chitunha chaapo. Izvi ndizvo zvaanoti ndiwo mutombo wawo unoidaidze mare mubhizinisi. Mukutsvaratsvara kwendakaita, kwakaoneke kuti anhu anonyanye kutore musoro wemunhu, kubaatekateka wakadaro. Angatorahe musikarudzi wechimuna, mwoyo, mazamo kana ari munhu wechidzimai. Zviro izvi zvinotorwa zvozwi pakachira pombere pombere kwaakootsira panonga peiakwe mbatso yebhizinisi racho.
Pane tsika inohambirana nekufushire zviro izvi pambatso iyi yebhizimisi. Amweni anoti unodaire kuti uzvifushire uri mutitinini uyehe weizvisunda ngematako atei zviwire murindi riya rewakatsa kazhinji kacho rinonga riri pakati pembatso yebhizinisi iya yeunonga uri kuaka. Saka apa tiri kuti isisu zviro izvi zvine utyongondo hwazvo wakareba kudai ngekureba kunozoite doodzi rengozi, payana petinozozwe kuti ngana uya wakafa payana womuka kumhatso kwangana.
Wozozwa kunokuno yaa mudzimbahwe. Tichazoreketa hedu ndiyo ndaa yengozi ngerimweni zuwa, kwenyamashi ngatimboemera pano atei vhiki rinouya.
Pane angade kureketa naPenyai ngatidhibhane pa0772 332 264/0712 948 959
