Kwayedza
Muchaneta Chimuka
GADZIRIRO dzekuvhurwa kwezvikoro – izvo zvichazarurwa muzvikamu zviviri kutanga nemusi wa15 Kurume kuvadzidzi vari kunyora bvunzo – dzava padanho repamusoro apo matanho ose akakodzera ari kutorwa mukuona kuti vana vadzivirirwa kubva kuchirwere cheCovid-19.
Vamwe vana vose vachazovhura chikoro nemusi wa22 Kurume.
Mukuru anoona nezvekuburitswa kwemashoko kubazi redzidzo yepuraimari nesekondari, VaTaungana Ndoro vanoti gadziriro dzekuvhurwa kwezvikoro dzasvika kwamvura yacheka makumbo apo dzimwe nhengo dzebazi ravo dzakatoshanyira zvimwe zvikoro dzichiita ongororo.
“Svondo rapera, nhengo dzedu dzekumahofisi makuru edzidzo dzakashanyira zvikoro, zvemabhodhingi kunyanya, dzichiongorora kugadzirira kwavaita maringe nekuzovhurwa kwezvikoro sezvo muzvikoro izvozvo makambosanganikwa nedambudziko rekunyuka kwechirwere cheCovid-19 gore rapera,” vanodaro.
VaNdoro vanoenderera mberi vachiti, “Tinenge tichitarisa nyaya dzekuregedza kuungana, kushandiswa kwedzimwe nzvimbo dziri pazvikoro zvebhodhingi dzakadai sedzimba dzekubikira. Takaona zvekare kuti chimiro chemba dzekufundira chakanaka zvikuru kuti vana vange vachidzidza,” vanodaro.
Kwayedza yakaita hurukuro nevamwe vabereki maringe negadziriro dzekuvhurwa kwezvikoro.
“Panguva yelockdown yapfuura tanga takagara kudzimba nekuti mamwe makambani atinoshandira akanga asiri muchikwata chinokosheswa (essential service) saka ainge akambovhara. Izvi zvakaona tichiwaniswa chidimu chemari dzataitambira saka tichiri panguva yakaoma uye zvikoro zvikavhurwa pane mikana yekuti vana vedu vachaenda vasina zvinhu zvakakwana,” vanodaro VaTonderai Munacho vekuZengeza 4, kuChitungwiza.
Vanoti mitengo yezvinhu zvakadai semabhuku, mayunifomu kana icho chikafu chinofanirwa kutakurwa nevana kuchikoro yakatokwira.
Vamwe vabereki ndivowo vari kuti kudai Hurumende yapindira pakubhadharwa kwemari yelevy yakanangana nechirwere cheCovid-19.
“Nekuda kwekuomerwa kwatakaita munguva yelockdown, sevabereki tava kukumbirawo Hurumende nevamwe vatsigiri kuti vatibatsirewo pamari yeCovid-19 levy nekuti temu yadarika zvimwe zvikoro zvakanga zvava kuda mari iyi iri maUS$. Izvi zvinobatsira kuti maticha nevamwe vashandi vepazvikoro uye vana vedu vachengetedzeke nekuti vanenge vaine zvinovabatsira mukudzivirira chirwere cheCovid-19.
“Kana vabereki vakawandirwa nemutoro havazooni kukosha kwedzidzo nekuti tinobva kwakasiyana,” anodaro Tinopona Mlilo wekuUnit L, kuChitungwiza.
Vamwe vabereki ndivo vachiri kuchema-chema nenyaya yekushaikwa uye kushomeka kwenzvimbo dzeFomu 1.
“Tinotenda zvikuru Hurumende nekuzivisa vezvikoro kuti vaderedze huwandu hwevana kuti chirwere ichi chisaramba chichipararira. Asi dambudziko rekushaikwa kwenzvimbo dzeFomu 1 ndiro rakura. Taedza kutsvaga nzvimbo asi kwese kuri kungonzi kwakazara saka vana vava kushungurudzika uye isu vabereki tanga tichida kugadzirirawo nenguva kuti tisazoita chipatapata munguva yekuvhurwa kwezvikoro,” vanodaro VaTaurai Fakazi nekuBudiriro 2, muHarare.
