Kwayedza
Abel Ndooka
CHIKWATA chenyika checricket chemaChevrons chichabandana neIreland mumitambo mitanhatu inoti mitatu yeTwenty20 International (T20I) nemimwe mitatu yeOne Day International (ODI).
Mitambo yezvikwata zviviri izvi ichatambwa munaZvita kunhandare yeHarare Sports Club.
Muchinyorwa, Zimbabwe Cricket inoti mitambo yemaChevrons neIreland yekutanga ichaona zvikwata izvi zvichatatsurana mumitambo yeTwenty20 mazuva anoti 7, 9 na10 Zvita uye mitambo iyi ichipera yeODI inobva yatanga iyo ichatambwa mazuva anoti 13, 15 na17 Zvita.
MaChevrons neIreland zvakapedzisira kusangana kutanga kwegore rino munaNdira apo zvikwata zviviri izvi zvakatamba mitambo yeTwenty20 neODI zvekare.
Pamitambo iyi, maChevrons akakunda Ireland 2-1 mumitambo yeTwenty20, kuchiti weODI wakazopera uri mangange 1-1 sezvo mutambo wekupedzisira usina kuzopera kutambwa nekuti wakakanganiswa nekunaya kwemvura.
