Kwayedza
UNOZIYA watochizwa kuti kudhaya tatopinda muchirongwa chedu chemadimikira. Dai iri nyoka zviyana, chasara kuponde soro rayo. Taiya nabambomukuru edu kwaMatanho etaitsvinyire kuti Pondesoro.
Saka apa rekai ndipondewo soro racho ngekureketa ngemadimikira, asi ndatoreketa ngaakawanda kugume pendaari pano.
Anoziya atochiona karetu ngekuti watokumana nacho kudhaya chiro chakhona. Dimikira redu rekutanga rinoti: musvosva beto, rechipiri rinoti kwamambo akuna beto, rimwe muromo indombi.
Teshe tinoziya kuti mangwanani ayana, kunyanya ukahambe munjira ine mwenje zviyana, unokumana nebeto.
Kai kweduyo ariyo anhu anozwi ekwaBeto. Izina rakamhoryoka yaemho iri. Saka weihambe mupato rine mwenje kudaro, mwenje uyana unonga une beto.
Kana usikadi kuti beto riyana rikutotese, unohamba nekamuti kako keunosvosva ndiko beto kuti riwire pashi. Kamuti akako ndiko ketinoti kamusvosva beto kako. Kana kuti weida hako kuringira ngeumweni muono, unokone kutore zvifana zvako zveunotungamidze mberi, iweiwe mumasure. Zvifanezvo zveunoise mberi zveihamba zveiguwe beto, ndiwohe wetingati waa musvosva beto wako.
Dimikira redu rechipiri: “Kwamambo akuna beto.” Rakamaabamba dimikiraro. Rinobhuye kuti kunyazi kubanziyo akuhambiki ngebeto, kana wadaidzwe kwamambo unotoshushirana naro beto weiende kwamambo. Chauya chauya, kutotsike padera paro beto weiende kwamambo. Rekerekezvo, mambo unotume chikhonzi chake kukuteera. Hino ukaona chadaro zviya — kwashata!
Ngatipedzise masengerwa edu teiti muromo indombi. Teeshe tinoiziya ndombi. Ndakaaona inini aiti dai ndandoramba ndiri ndombi hangu, asi Marure wakazviramba mudare rakwe.
Pane angade kureketa naPenyai ngatidhibane pa 0772 332 645-/0712 948 959
