Kwayedza
Kingstone Mapupu
MUMWE wemaporofita mashanu anova makuru muchechi yeJohane Masowe weChishanu pasi rose, Madzibaba Edward Manyara, avo vainamatira mumusha weWarren Park, muguta reHarare, vakashaika mutsaona yemotokari nemusi weMuvhuro svondo rino.
Vanga vave nemakore 67 okuberekwa.
Mutauriri wemapurisa munyika, Assistant Commissioner Paul Nyathi, vanotsinhira vachiti Madzibaba Edward vakashaikira mutsaona yakaitika panzvimbo inodaidzwa kuti “Mr Maplanka” mumugwagwa unobva muHarare uchienda kuBulawayo apo vaiva mumotokari yerudzi rweToyota Hilux iyo yaityairwa naMhondoro Garikai (52) iyo yakabva vhiri ndokupidiguka kakawanda.
“Mashoko atiinawo ndeekuti Madzibaba Edward Manyara sekuzivikanwa kwavaiitwa muchechi yavo yeJohane Masowe weChishanu vakashaika. Motokari yavaifamba nayo yakasvotoka vhiri rekumashure ndokupidiguka kakawanda apo vaviri ava vose vakakuvara,” vanodaro Asst Com Nyathi.
Vanoti vaviri ava vakazoendeswa kuchipatara uko Madzibaba Edward vakasvika vachishaya.
Garikai anonzi ari muchipatara umo achiri kurapwa.
Asst Com Nyathi vanoyambira vatyairi kuti vatange vaongorora motokari dzavo vasati vatanga kufamba nzendo, zvikuru munguva ino yekunaya kwemvura.
“Semapurisa, tiri kuferefeta nyaya iyi kuti chii chakakonzera tsaona iyi. Tinokurudzira vatyairi nevamwewo vanhu kuti vagadzirise motokari dzavo zvizere vasati vapinda mumigwagwa uyewo vorega kumhanya zvakanyanya. Migwagwa yedu iri kutsvedza nekunaya kwemvura uyewo vanhu ngavaise mawipers pamota dzavo, votarisa matayi emotokari dzavo nekuti hatizive kuti chii chakazoita kuti motokari iyi isvotoke vhiri,” vanodaro.
Vamwe vari muhutungamiri hweJohane Masowe weChishanu pasi rose vanosanganisira Madzibaba Israel Mohana vechechi yekuCoca Cola, muguta reHarare, naMadzibaba Lawrence Katsiru vekuMarondera.
Pazobuda nyaya ino, hurongwa hwekuvigwa kwaMadzibaba Edward hwange husati hwave kuzivikanwa.
