Kwayedza
Abel Ndooka
PUROVHINZI yeMashonaland Central ndiyo yakahwina mubairo mukuru mumutambo weAssociation of Independent Colleges in Zimbabwe National Athletics Competition uyo wakaitirwa pchikoro cheJameson kuKadoma svondo radarika.
Mashonaland Central yakahwina menduru dzegoridhe 30, 19 dzesirivha ne12 dzebhuronzi.
Mashonaland West yaitevera mugotsi iine menduru 25 dzegoridhe, 40 dzesirivha ne19 dzebhuronzi.
Purovhinzi yeManicaland ndiyo yakapedza iri pechitatu ine menduru 12 dzegoridhe, 11 dzesirivha ne21 dzebhuronzi.
Midlands yakawana menduru pfumbamwe dzegoridhe, 16 dzesirivha ne11 dzebhuronzi, kuchiti Harare yaive nemenduru nhatu dzegoridhe, imwechete yesirivha neina dzebhuronzi.
Mash East ndiyo yakapedza iri pasi sezvo yakangokwanisa kuhwina menduru dzembiri dzegoridhe, nomwe dzesirivha nepfumbamwe dzebhuronzi.
Sachigaro weAssociation of Independent Colleges in Zimbabwe – Professor Washington Mahiya – anoti sangano ravo reAICZ rinoronga mitambo iyi nechinangwa chekusimudzira vadzidzi vemumakoreji nekuvapa mukana wekugadzira mazita avo mune zvemitambo.
“Mitambo yakakosha zvikuru munyaya dzedzidzo uye muhupenyu hwevadzidzi naizvozvo isu semakoreji akazvimirira tinoronga mitambo iyi nechinangwa chekuvapa mikana yakasiyana yekuti vasimukire mune zvemitambo.
“Havasi vese vane chipo chekugona muchikoro, vamwe vane zvipo zvemitambo yakasiyana naizvozvo inotofanirwa kuitwa muzvikoro zvese,” anodaro.
Prof Mahiya anoenderera achiti sangano ravo mune remangwana rinoshuvira kushanda nereNational Association of Schools Heads (NASH) vachikwikwidza nezvikwata zvinenge zvahwina kumitambo yeNASH.
“Tinoyemura zvedu zvinoitika kuNASH zvekuti isu mune remangwana tinoda chaizvo kuzomboshanda nayo mukuronga mitambo yakasiyana topota tichikwikwidza.
“Izvi zvinobatsira tese nekuti tinenge tichiumba zvikwata zvedu tisati taenda kunokwikwidza kumitambo yekunze kwenyika,” anodaro Prof Mahiya.
Munguva pfupi inotevera, Mashonaland Central iyo yakahwinha svondo radarika ichatanga kuita gadziriro dzekumirira Zimbabwe kumakwikwi emakoreji enyika dzakasiyana achazoitwa kuBotswana.
