Kwayedza
Rudo Muchedzi
KAMBANI huru mune zvenhau munyika muno, yeZimpapers, yakawana mubairo weSustainable Development Goals (SDG) and Community Impact Award kuchirongwa cheNational Responsible Business and Corporate Social Responsibility Awards icho chichangobva kuitwa. Panguva imwecheteyo, mukushi wemashoko mukambani iyi, Muzvare Beatrice Tonhodzayi, vakapihwa mubairo muchikamu cheTop 10 Corporate Social Responsibility (CSR) Managers of the Year panyaya dzekugona kuita mabasa etsitsi.
Mibairo iyi yauya apo Zimpapers iri kubudiririra muzvirongwa zvayo zvekubatsira mazana nemazana evanhu mukurwisa zvirwere zvegomarara kuburikidza nemapazi ayo ari muHarare, Bulawayo, Mutare neKariba.
Zimpapers yakakwanisa kuunganidza mari nezvirongwa zvayo zvinosanganisira Annual Cancer Power Walk inova ichaendeswa kusangano reIsland Hospice nechinangwa chekurwisa gomarara.
“Ndinotenda veruzhinji muZimbabwe nekutsigira mabasa etsitsi atinoita sekambani tichibatsira vanhu. Zvakakosha kuti vanhu vazive nezvezvirwere zvinovatambudza kuti vagotore matanho ekuzvidzivirira nenguva,” vanodaro Muzvare Tonhodzayi.
Vanoti kuburikidza nemabasa etsitsi, Zimpapers yakakwanisa zvakare kubatsira vanhu vakawirwa netsaona yemafashamu eCyclone Idai kuChimanimani nechikafu nembatya.
“Zvakare, tiri kuvakurudza Chikukwa Primary School kuChimanimani ikoko mushure mekuparadzwa kwakaita chikoro ichi nemafashamu,” vanodaro.
