Kwayedza
Kingstone Mapupu
MAPURISA ekuMashonaland Central vanoti vachiri kutsvaga nemaziso matsvuku muporofita wechechi yeJohanne Marange wemubhuku raDzemwa, kwaMambo Musana, kuBindura nemhosva yaari kupomerwa yekuponda mudzimai wake wechi11 pabarika revakadzi 22.
Mutauriri wemapurisa kudunhu iri, Inspector Milton Mundembe, vanoti vari kutsvaga Joseph Chogugudza (51) nemhosva yekuponda mudzimai wake, Emerina Gandira.
Chogugudza anonzi akaponda Gandira achimupomera kuita gumbo mumba gumbo kunze.
“Tine nyaya yemurume wechechi yepositori anonzi akaponda mudzimai wake aiva wechi11 pachipari chemadzimai 22 achimupomera kuita zvechipfambi. Anonzi akamurova netambo yemagetsi muviri wose kwehusiku hwose mamwe madzimai ake akayeva kubva musi wa12 Kubvumbi kusvika mangwanani emusi wa13 Kubvumbi apo mukadzi uyu akazopunzika pasi ndokufa,” vanodaro Insp Mundembe.
Murume uyu anonzi rechimangwana racho akatombotora madzimai ake ose ari 22, kusanganisira Gandira, akaenda nawo pamasowe pake vachinamata, apo nyakurarorohwa akazodonha vave kubva kumasowe achibva angofa.
“Murume uyu anonzi aona kuti ainge auraya mukadzi wake, akazobvisa mbatya dzaive neropa remudzimai waakaponda uyu achibva anyepera mamwe madzimai kuti aienda kunozvipira kumapurisa ekuShamva uko asina kusvika ndokutiza. Nekudaro tiri kumutsvaga nemaziso matsvuku,” vanodaro Insp Mundembe.
Vanokurudzira veruzhinji vanoziva kuna Chogugudza kuti vazivise mapurisa ari pedyo navo.
“Murume uyu tiri kuda kuti asungwe agopinda mumatare edzimhosva nenyaya yaari kupomerwa yekuponda mudzimai wake,” vanodaro.
