Kwayedza
Munyori weKwayedza
MUNYAYA inotyisa zvikuru, mapurisa emuHarare akaita mahwekwe nemurume ainge aine musoro wemunhurume mubhuti remota mangwanani emusi weMugovera wadarika.
Mutyairi wemota yerudzi rweToyota Funcargo, iyo inofungidzirwa kuti yakabiwa – Emmanuel Matsika (27) – akambozama kutiza ndokudzingirirana nemapurisa kudzimara abatwa apo mumota make makawanikwa muine musoro wemunhurume usina mutumbi.
Kubatwa kwaMatsika kunoteverawo nyaya yemutumbi wemunhu uyo uchangobva kuwanikwa usina musoro nerimwe gumbo muchimbuzi chisisashandiswe kunzvimbo yeLight Industrial Area, muHarare.
Mutauriri wemapurisa eZimbabwe Republic Police (ZRP) munyika, Assistant Commissioner Paul Nyathi, vanotsinhira nyaya iyi.
“Tinotsinhira kuti pane murume watawana aine musoro (wemunhu) mumota uyo watasunga,” vanodaro Asst Comm Nyathi.
“Zviri kunzi musungwa uyu anga achityaira mota yakabiwa izvo zvakonzera kuti adzingirirane nemapurisa.
“Kutaura kuno murume uyu ari mumawoko memapurisa uye tichazivisa zvakawanda nekufamba kwenguva,” Asst Comm Nyathi vakaudza Kwayedza nemusi weMugovera manheru.
“Chekutanga, mutumbi wemunhu uyo wainge usina musoro nerimwe gumbo wakatanga kuwanikwa uri muchimbuzi chisisashandiswe kuna Lytton Road, muno muHarare.
“Zvino nhasi (Mugovera) murume ave kubatwa aine musoro wemunhurume mubhuti remota,” vanodaro.
Mifananidzo yemusoro wemunhu wakawanikwa inotyisa kutarisa uye zvinoratidzika kuti wakanyatsodimburwa ndokuputirwa mumapepabheki.
Zvinoratidzawo kuti musoro uyo wainge wakagerwa vhudzi zvekusara riri diki-diki uye munhurume uyu aive nendebvu dzepamusoro pemuromo idzi dzakanyatsogadzirwa.
Zvichakadai, Matsika akatomira mudare redzimhosva muHarare akatarisana nemhosva yekuponda David Arendi.
Matsika, uyo anoti haana pekugara kunze kwekuti anowanikwa kunorasirwa marara kuUniversity of Zimbabwe, akamira pamberi pemutongi Elisha Singano ndokunzi adzoke kudare musi wa7 Ndira apo achange akavharirwa.
Zvinonzi Matsika akaruka zano rekuponda Arendi.
Ndipo paakaenda kuchimbuzi chisisashandiswe panosangana migwagwa Lytton naPaisley kuWorkington, Harare, musi wa21 Zvita, ndokunoponda Arendi, achibva amugura musoro nebanga.
Akatora musoro waArendi ndokusiya mutumbi.
Matsika akaratidza mapurisa mapondero aakaita Arendi. Anoti akanzi anofanirwa kudimbura mutsipa waArendi mutumbi wakatarisa pasi.
