Kwayedza
SANGANO remachiremba echivanhu nemaporofita, reZimbabwe National Practitioners Association (ZINPA), rinoti nhengo dzaro dzose dzava pedyo kupera kubaiwa majekiseni ekudzivirira Covid-19 zvizere.
Vachitaura pagungano resangano iri rekupera kwegore mumusha weHighfield, muguta reHarare, mukuru weZINPA – Bishop Cuthbert Nyaruvenda – vanoti panhengo dzavo dzinodarika zviuru zvina, chikamu chinosvika 70 percent chabaiwa nhomba idzi.
Musangano uyu wakapindwa nen’anga, maporofita, vananyamukuta nevamwe vanobatsira pachivanhu.
Bishop Nyaruvenda vanoti zvakakosha kuti machiremba echivanhu nevamwe veruzhinji vasaterere mashoko enhema ekuti majekiseni ekudzivirira Covid-19 anokonzera matambudziko.
“Isu semachiremba echivanhu, tiripo kubatsira upenyu hwevanhu nekufambisa mashoko echokwadi tichitsigirana neHurumende. Saka tinoti vanhu ngavabaiwe majekiseni, haana chakaipa chaanokonzera.
“SeZINPA, tine machiremba nemaporofita ari muboka redu anodarika zviuru zvina apo chikamu chinosvika 70 percent vakatobaiwa kare,” vanodaro Bishop Nyaruvenda.
Vanoti vakaona zvakakosha kuti machiremba echivanhu vabaiwe nhomba idzi sezvo vachisangana nevanhu vakasiyana mubasa ravo izvo zvinoita kuti pave nenjodzi yekutapurirana denda iri.
“Vanouya kwatiri kuzobatsirwa ngationei kuti vakabaiwa here nhomba idzi kuitira kuti isu tozvidzivirira ivowo vakazvidzivirira. Mumatare enhengo dzedu ose, tinokurudzira kuti ave nezvekushandisa zvakaita semasanitiser, vanhu vopfeka mamasiki nenzira kwadzo nekuita zvimwe zvose zvinokurudzirwa nenyanzvi dzezveutano,” vanodaro.
Mai Sarudzai Jaravaza (54) vanova mutevedzeri wemukuru wesangano iri, vanotiwo vari kudyidzana nenyanzvi dzezveutano munzvimbo dzose dzine nhengo dzavo nechinangwa chekuti vabaiwe nhomba pamwe nekudzivirira kupararira kweCovid-19.
Mbuya Jaravaza
“Ndiyani akati n’anga nemaporofita hatibaiwe majekiseni? Isu wani vanaMbuya Jaravaza nanaBishop Nyaruvenda takabaiwa! Kune mashoko emanyepo anotaurwa nekuda kwenhomba idzi, siyanai nawo. Ngatitevedzerei zvinotaurwa neHurumende tibaiwe tose. Chionai chirwere ichi chiri kukwira,” vanodaro Mbuya Jaravaza.
Vanoti sangano ravo riri kugara richipa chenjedzo kunhengo dzaro nekuda kwechirwere ichochi.
“Nguva ino yechirwere ichi vanhu havafanirwe kuungana nekudaro tiri kushandisa maWhatsApp groups muzvizhinji zvatinoita, kutumirana mavhidhiyo kuburikidza nedzimwe nzira dzinosanganisira YouTube neInstagram,” vanodaro.
Mbuya Jaravaza vanoti nekuda kweCovid-19, sesangano vakatadza kuchema zvizere vaimbove mukuru weZINPA, VaFriday Chisanyu pamwe naMbuya Agness Carson, avo vakashaika nguva yadarika.
“Tine hurombo seZINPA, takarasikirwa nevaiva president vedu VaChisanyu naMbuya Carson. Takatadza kuvachema zvizere nekuda kwekuti mutemo waitirambidza kuungana, asi hativakanganwe nebasa guru ravakaita.”
Zvisinei, Mbuya Jaravaza vanoshora nyaya dzekuroodzwa kwevanasikana vasati vabva zera idzo dzavanoti dzawedzera munguva ino yechitrwere cheCovid-19.
“Takaona kukwira kwenyaya dzekuroodzwa kwevana vari pasi pezera munguva ino yeCovid-19 zvichitevera kuoma kwezvinhu uyewo nekupondwa kwevana nenzira dzekuchekeresa vanhu vachida mari. Isu seZINPA tinoshora zvose izvi tichiti hakuna chiremba wechivanhu anokurudzira kudeurwa kweropa,” vanodaro.
